ទិវាជាតិលើកកម្ពស់អនាម័យជនបទ ១៣វិច្ឆិកា លើកទី៩ ឆ្នាំ២០១៨ នៅស្រុករំដួល ខេត្តស្វាយរៀង

(ស្វាយរៀង)៖ ក្រោមអធិបភាពឯកឧត្ដម តូច ប៉ូលីវា អភិបាលរងខេត្ត តំណាងដ៏ខ្ពង់ខ្ពស់ឯកឧត្ដម ម៉ែន វិបុល អភិបាលខេត្តស្វាយរៀង បានអញ្ជើញជាជាអធិបតីក្នុង ទិវាជាតិលើកកម្ពស់អនាម័យជនបទ ១៣វិច្ឆិកា លើកទី៩ ឆ្នាំ២០១៨ និងមានការចូលរួមពី លោក ហុក បូទី ប្រធានមន្ទីរអភិវឌ្ឍន៍ជនបទ លោក សុខា រ៉ាម អភិបាលស្រុករំដួល និងលោក លោកស្រី ប្រធាន-អនុប្រធានមន្ទីនានាជុំវិញខេត្ត សិក្សានុសិស្ស បងប្អូនប្រជាពលរដ្ឋ នៅព្រឹកថ្ងៃទី២៩ ខែវិច្ឆិកា ឆ្នាំ២០១៨នេះនៅបរិវេណសាលាអនុវិទ្យាល័យស្វាយចេក ឃុំស្វាយចេក ស្រុករំដួល ខេត្តស្វាយរៀង  មានអ្នកចូលរួមសរុបចំនួន ៦៩១នាក់ ។

នៅក្នុងឪកាសនោះផងដែរ ឯកឧត្ដម តូច ប៉ូលីវា បានអានសារលិខិតរបស់ សម្ដេចតេជោ ហ៊ុន សែន សូមថ្លែងអំណរគុណចំពោះដៃគូអភិវឌ្ឍន៍ និងអង្គការមិនមែនរដ្ឋាភិបាលទាំងឡាយ ដែរបាននិងកំពុងធ្វើកិច្ចសហប្រតិបត្តិការទ្វេភាគី និងពហុភាគី ជាមួយរដ្ឋាភិបាលកម្ពុជា លើការអភិវឌ្ឍន៍គ្រប់វិស័យ ដែលនេះគឺជាការចូលរួមចំណែកយ៉ាងសកម្ម និងផ្ដល់ការគាំទ្រដ៏សប្បុសដល់ការខិតខំប្រឹងប្រែងយ៉ាងប្ដូរផ្ដាច់របស់រាជរដ្ឋាភិបាល ។ជាមួយនេះដែរយើងទាំងអស់គ្នា ទាំងព្រះសង្ឃនិងគ្រហស្ថ ត្រូវខិតខំប្រឹងប្រែងបន្ថែមទៀតដើម្បីសម្រេចអោយបាននូវទស្សនវិស័យរបស់រាជរដ្ឋាភិបាលដែលបានកំណត់ "ប្រជាជន ជនបទាំងអស់និងទទួលបានសេវាផ្គត់ផ្គង់ទឹកស្អាត និងអនាម័យប្រកនដោយសមធម៍និងមាននិរន្ដរភាពនៅឆ្នាំ ២០២៥ ។

ជាមួយនេះផងដែរ លោក ហុក បូទី មានប្រសាសន៍ថាដោយការខិតខំប្រឹងប្រែងអនុវត្តរបស់ក្រុមការងារ PTWG-RWSSH និងដៃគូពាក់ព័ន្ឋ បានធ្វើអោយប្រជាពលរដ្ឋខេត្តស្វាយរៀង បានយល់ដឹងនិងពុទ្ធិការទម្លាប់អនុវត្តន៍អនាម័យល្អ ការធ្វើទឹកអោយមានសុវត្តិភាពមុនពេលបរិភោគ និងការសម្អាតអនាម័យលំនៅស្ថាន ដែលធ្វើអោយប្រជាពលរដ្ធមានសុខភាពល្អ និងជីវភាពធូធារស្របនិងពាក្យស្លោកលើកឡើងថា «ការពារប្រសើរជាងព្យាបាល» ។

ជាក់ស្ដែងគិតត្រឹមឆ្នាំ២០១៨នេះ ប្រជាពលរដ្ឋប្រមាណ ៩៩.៥០% មានប្រភពទឹកប្រើប្រាស់ និងគ្រួសារប្រើប្រាស់ទឹកមានសុវត្ថិភាពចំនួន ៨៥.៣% ខ្នងផ្ទះប្រជាពលរដ្ឋចំនួន ៨៦% មានបង្គន់អនាម័យប្រើប្រាស់ដែលក្នុងនោះមានភូមិចំនួន២៧២ ឃុំចំនួន២០ និងស្រុកចំនួន១គឺ ស្រុកស្វាយទាប សម្រេចបានបញ្ឃប់បន្ទោរបង់ពាសវាលពាសកាល (ODF) និងបានធ្វើពិធីប្រកាសទទួលស្គាល់ជាផ្លូវការ ។ជាចុងបញ្ចប់នៃកម្មវិធីលោក ហុក បូទី ក៏បានសំណូមពរអោយបងប្អូនប្រជាពលរដ្ឋទាំងអស់ ហូបស្អាត ផឹកស្អាត រស់នៅស្អាត និងអនាម័យល្អ ដោយប្រើប្រាស់បង្គន់អនាម័យអោយបានគ្រប់ៗផ្ទះ និងគ្រប់មូលដ្ឋានផងដែរ ៕ ដោយ៖ភក្ដី