ពិធីបិទការប្រកួតកីឡាសិស្សបឋមសិក្សាជ្រើសរើសជើងឯកថ្នាក់ខេត្តប្រចាំឆ្នាំសិក្សា២០១៨-២០១៩ នៅមន្ទីរអប់រំខេត្តស្វាយរៀង

(ស្វាយរៀង)៖ ក្រោមអធិបភាពលោក តូច ប៉ូលីវា អភិបាលរងខេត្ត ក្នុងពិធីបិទការប្រកួតកីឡាសិស្សបឋមសិក្សាជ្រើសរើសជើងឯកថ្នាក់ខេត្តប្រចាំឆ្នាំសិក្សា២០១៨-២០១៩ នៅរសៀលថ្ងៃទី១៥ ខែកុម្ភៈ ឆ្នាំ២០១៩ និងមានការចូលរួមពីលោក លោកស្រី ប្រធាន-អនុប្រធានមន្ទីរនានាជុំវិញខេត្ត លោកអភិបាលក្រុង លោក លោកស្រី ប្រធានការិយាល័យក្រុង-ស្រុកខណ្ឌ និងក្មួយៗកីឡាករ កីឡាការិនី ជាច្រើនរូបទៀត ។

ហើយការប្រកួតកីឡាសិស្សបឋមសិក្សាជ្រើសរើសជើងឯកថ្នាក់ខេត្តប្រចាំឆ្នាំ 2018-2019 នូវប្រភេទកីឡាដូចជា៖ (បាល់ទាត់,បាល់បោះ,បាល់ទះ,និងអត្តពលកម្ម) ដែលបានចាប់ផ្ដើមពីថ្ងៃទី 11 ដល់ថ្ងៃទី 15 ខែកុម្ភៈ ឆ្នាំ2019 នៅក្រុងស្វាយរៀង ខេត្តស្វាយរៀង ដោយមានកីឡាករ កីឡាការិនី ទាំង8ក្រុង-ស្រុក ចូលរួមចំនួន 22ក្រុម មានចំនួន 306 នាក់ កីឡាការិនីចំនួន 153 នាក់ ។

ក្នុងឱកាសនោះផងដែរ លោកតូច ប៉ូលីវ៉ា បានមានប្រសាសន៍ថា៖ ចំពោះលទ្ធផលដ៏ល្អនេះ និងសូមកោតសរសើរស្មារតីស្នេហាវិស័យកីឡារបស់ក្មួយក្មួយៗលើគ្រប់វិញ្ញាសា ដែលបានមកចូលរួមប្រកួតក្នុងឱកាសនេះដើម្បីជ្រើសរើសជើងឯកថ្នាក់ខេត្តប្រចាំឆ្នាំសិក្សា 2018-2019 ។ ក្មួយៗកីឡាករ កីឡាការិនី ព្រមទាំង សិស្សានុសិស្សទាំងអស់ដឹងហើយថា រាជរដ្ឋាភិបាលដែលមានសម្ដេច ហ៊ុន សែន ជានាយករដ្ឋមន្រ្តីនៃព្រះរាជាណាចក្រកម្ពុជា កំពុងយកចិត្តទុកដាក់យ៉ាងខ្លាំងក្លា និងផ្ដល់អាទិភាពជាចំបងដល់វិស័យអប់រំយើងក្នុងនោះក៏មានវិស័យអប់រំកាយ និងកីឡាផងដែរ ពីព្រោះវិស័យនេះបានចូលរួមចំណែកយ៉ាងសំខាន់ក្នុងការជួយកាត់បន្ថយភាពក្រីក្រ កាត់បន្ថយការប្រើប្រាស់គ្រឿងញៀន កាត់បន្ថយអំពើហិង្សាក្នុងគ្រួសារ និងភាពអសកម្មទាំងឡាយនៅក្នុងសង្គម ព្រមទាំងបានជួយឲ្យមនុស្សគ្រប់រូបមានសុខភាពល្អ ប្រាជ្ញាភ្លឺថ្លា សីលធម៌ល្អក្នុងសង្គម សំដៅឲ្យក្មួយក្មួយទាំងអស់បានក្លាយទៅជាពលរដ្ឋល្អ មានលទ្ធភាពគ្រប់គ្រាន់ក្នុងការចូលរួមកសាងនិងការពារជាតិមាតុភូមិកម្ពុជាដ៏បវររបស់យើង ។

សូមបញ្ជាក់ផងដែរថាចំពោះលទ្ធផលនៃការប្រកួតកីឡាទាំង4ប្រភេទមានដូចខាងក្រោម៖

1- ប្រភេទកីឡាបាល់ទាត់

-ចំណាត់ថ្នាក់លេខ1 បានទៅលើស្រុកកំពង់រោទិ៍ ទទួលបានថវិកាបានចំនួន1,800,000រៀល

-ចំណាត់ថ្នាក់លេខ2 បានទៅលើស្រុកស្វាយទាប ទទួលបានថវិកាបានចំនួន1,440,000រៀល

-ចំណាត់ថ្នាក់លេខ3 បានទៅលើស្រុករមាសហែក ទទួលបានថវិកាចំនួន1,080,000រៀល

2- ប្រភេទកីឡាបាល់ទះ

-ចំណាត់ថ្នាក់លេខ1 បានទៅលើស្រុកស្វាយទាប ទទួលបានចំនួនថវិកាចំនួន1,200,000រៀល

-ចំណាត់ថ្នាក់លេខ2 បានទៅលើស្រុកស្វាយជ្រំ ទទួលបានថវិកាចំនួន960,000រៀល

-ចំណាត់ថ្នាក់លេខ3 បានទៅលើស្រុកចន្ទ្រា ទទួលបានថវិកាចំនួន720,000រៀល

3- ប្រភេទកីឡាបាល់បោះ

-ចំណាត់ថ្នាក់លេខ1 បានទៅលើក្រុងស្វាយរៀង ទទួលបានថវិកាចំនួន1,200,000រៀល

-ចំណាត់ថ្នាក់លេខ2 បានទៅលើស្រុករមាសហែក ទទួលបានថវិកាចំនួន960,000រៀល

-ចំណាត់ថ្នាក់លេខ3 បានទៅលើស្រុកកំពង់រោទិ៍ ទទួលបានថវិកាចំនួន720,000រៀល

4- ប្រភេទកីឡាអត្តពលកម្ម

-ចំណាត់ថ្នាក់លេខ1 បានទៅលើក្រុងស្វាយរៀង ទទួលបានថវិកាចំនួន400,000រៀល

-ចំណាត់ថ្នាក់លេខ2 បានទៅលើស្រុកស្វាយទាប ទទួលបានថវិកាចំនួន320,000រៀល

-ចំណាត់ថ្នាក់លេខ3 បានទៅលើស្រុករមាសហែក ទទួលបានថវិកាចំនួន240.000រៀល ៕ ដោយ៖ភក្ដី