ពិធីបិទសន្និបាតបូកសរុបលទ្ធផលការងារប្រចាំឆ្នាំ២០១៨ និងទិសដៅការងារឆ្នាំ២០១៩

(ស្វាយរៀង)៖ លោកស្រីកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចនិងជាប្រធានក្រុមការងារថ្នាក់ជាតិចុះជួយខេត្តស្វាយរៀង បានថ្លែងថា៖ សូមអាជ្ញាធរខេត្តស្វាយរៀង ត្រូវបន្តផ្សព្វផ្សាយ អប់រំប្រជាពលរដ្ឋ ដែលរស់នៅតាមបណ្តោយព្រំដែន បញ្ឈប់ការជួលដីស្រែទៅអោយប្រទេសជិតខាង ដែលលោកស្រី បានថ្លែងក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០១៨ និងទិសដៅការងារឆ្នាំ២០១៩ របស់រដ្ឋបាលខេត្តស្វាយរៀ នៅរសៀលថ្ងៃទី១៣ ខែមីនា ឆ្នាំ២០១៩ ។

លោកស្រី ម៉ែន សំអន បានបន្តថា៖ កងកម្លាំងមានសមត្ថកិច្ច អាជ្ញាធរពាក់ព័ន្ធគ្រប់លំដាប់ថ្នាក់​ត្រូវ​​​ពង្រឹងបន្ថែម​ នូវកិច្ច​សហប្រតិបត្តិការ​អន្តរជាតិ ជាមួយភាគីវៀតណាម​ដើម្បីត្រួតពិនិត្យ និងទប់ស្កាត់​​គ្រឿង​​​ញៀន​ខុស​ច្បាប់​លួចលាក់ឆ្លងកាត់ព្រំដែន ដើម្បី​ឈាន​ដល់​ការកសាងភូមិស គ្មាន​​គ្រឿង​ញៀន និងពង្រឹងវិធានការរដ្ឋបាល និងវិធានការច្បាប់​ឲ្យបាន​ម៉ឺងម៉ាត់​ក្នុងការប្រយុទ្ធប្រឆាំង គ្រឿងញៀនខុសច្បាប់គ្រប់​ប្រភេទនៅទូទាំងខេត្ត ។

លោកស្រីបានបន្តទៀតថា៖ ក្នុង​នាម​រាជរដ្ឋាភិបាលកម្ពុជា ប្រធានក្រុមការងារ​ថ្នាក់​ជាតិ​ចុះជួយ​មូលដ្ឋាន​ខេត្ត​ស្វាយរៀងសូមធ្វើការកោត​​សរសើរ និង​វាយ​តម្លៃខ្ពស់​ចំពោះ​រដ្ឋបាល​ខេត្ត ដោយ​មាន​ការចូលរួម​ពីមន្ទីរ អង្គភាព​ជំនាញ​​នានា រដ្ឋបាល ក្រុង ស្រុក ឃុំ សង្កាត់ កង​កម្លាំង​មាន​សមត្ថកិច្ច និង​ប្រជាពល​រដ្ឋ​ ​នៃខេត្ត​ស្វាយរៀងទាំងមូល ដែល​បាន​ខិតខំ​រួម​គ្នា​​សម្រេចបាន​​នូវសមិទ្ធផល​លើ​គ្រប់វិស័យ រួម​ចំណែក​​ក្នុង​ការថែរក្សា សុខ សន្តិភាព​ស្ថិរភាព​​នយោបាយ រក្សាការពារ​​បូរណភាព​ទឹកដី អធិបតេយ្យភាព​​​ជាតិ សន្តិសុខ​សណ្តាប់​ធ្នាប់​សាធារណៈ សុវត្ថិភាពសង្គម និង​ខិតខំ​ជំរុញ​​ការអភិវឌ្ឍសេដ្ឋកិច្ច-សង្គម ៕ ដោយ៖ភក្ដី