ឯកឧត្តម សាយ សំអាល់ ចែកវិញ្ញាបនបត្រសម្គាល់ម្ចាស់អចលនវត្ថុ ចំនួន៩.៣៤៩ប័ណ្ណ នៅស្រុករមាសហែក

(ស្វាយរៀង): នៅព្រឹកថ្ងៃទី២៨ ខែឧសភា ឆ្នាំ២០៤ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជា ប្រធានក្រុមការងាររាជរដ្ឋាភិបាលចុះជួយស្រុករមាសហែក និងឯកឧត្តម ប៉េង ពោធិ៍សា អភិបាលខេត្តស្វាយរៀង បានអញ្ជេីញជអធិបតីក្នុងក្នុងពិធី ចែកវិញ្ញាបនបត្រសម្គាល់ម្ចាស់អចលនវត្ថុ ចំនួន ៩.៣៤៩ប័ណ្ណ ជូនបងប្អូនប្រជាពលរដ្ឋនៅភូមិថ្មី, ភូមិសណ្ដោ, ភូមិត្រពាំងស្មាច់, ភូមិដក់ព, ភូមិព្រែករមៀត, ភូមិខ្ពបត្រាច ឃុំជ្រៃធំ និងភូមិប្រមាត់ប្រាំ ឃុំកំពង់ត្រាច ស្រុករមាសហែក ខេត្តស្វាយរៀង។

ពិធីនេះមានការអញ្ជេីញចូលរួមពីឯកឧត្ដម លោកជំទាវរដ្ឋលេខាធិការ អនុរដ្ឋលេខាធិការ អគ្គនាយក ឯកឧត្ដម លោក លោកស្រីប្រតិភូក្រសួងរៀបចំដែនដី នគរូបនីយកម្ម និងសំណង់ឯកឧត្ដមអភិបាលរងខេត្ត តំណាងកងកម្លាំងទាំងបី លោក លោកស្រីប្រធានមន្ទីរ-អង្គភាព ក្រុមប្រឹក្សាស្រុក គណៈអភិបាលស្រុករមាសហែក លោក លោកស្រីជាក្រុមប្រឹក្សាឃុំ មន្ត្រីរាជការ លោកយាយ លោកតា បងប្អូនប្រជាពលរដ្ឋ សរុបប្រមាណជាង១ម៉ឺននាក់។

ឯកឧត្តម ប៉េង ពោធិ៍សា អភិបាលខេត្ត បានមានប្រសាសន៍ថា: ក្នុងនាមរដ្ឋបាលខេត្តសូមសម្ដែងនូវការកោតសរសើរ និងថ្លែងនូវការអរគុណចំពោះបងប្អូនប្រជាពលរដ្ឋ អាជ្ញាធរដែនដីគ្រប់លំដាប់ថ្នាក់ មន្ទីរជំនាញ ជាពិសេសមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តដែលជាប្រតិបត្តិករផ្ទាល់ និងអង្គភាពពាក់ព័ន្ធទាំងអស់ដែលបានខិតខំប្រឹងប្រែងចូលរួមទាំងកម្លាំងកាយចិត្តយ៉ាងមមាញឹក និងមិនខ្លាចពីការនឿយហត់ នៅក្នុងដំណើរការចុះបញ្ជីដីធ្លីលើគ្រប់នីតិវិធី និងគ្រប់ដំណាក់កាល ដើម្បីជំរុញការងារចេញ ប័ណ្ណសម្គាល់ម្ចាស់អចលនវត្ថុជូនប្រជាពលរដ្ឋឲ្យបានចេញជាផ្លែផ្កា នាពេលនេះ ដែល អាចនិយាយបានថា ប្រសិនបើគ្មានការរួមចំណែក និងចូលរួមលះបង់ទាំងនេះ យើង ពិតជាមិនអាចឈានទៅសម្រេចបានលទ្ធផលដូចជាពេលនេះបានឡើយ ។

ឯកឧត្តមអភិបាលខេត្ត មានប្រសាសន៍បន្តថា : រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានសម្រេច ដាក់ចេញនូវ «កម្មវិធីនយោបាយសម្រាប់ការកសាង និងការការពារមាតុភូមិ ឆ្នាំ២០២៣-២០២៨» ដោយនៅក្នុងគោលនយោបាយអភិវឌ្ឍតាមវិស័យ ក្នុងនោះក៏បានផ្តោតយ៉ាងសំខាន់លើការគ្រប់គ្រងដីធ្លី និងសំណង់ ដោយត្រូវបន្តអនុវត្តការកែទម្រង់ឲ្យកាន់ តែសកម្ម និងស៊ីជម្រៅ ក្នុងគោលដៅគ្រប់គ្រង និងអភិវឌ្ឍវិស័យដីធ្លី ឲ្យបានត្រឹមត្រូវ និងកាន់តែមានប្រសិទ្ធភាព តាមរយៈការពង្រឹងការគ្រប់គ្រងដីធ្លី ដោយជំរុញបញ្ចប់ ការចុះបញ្ជីដីគ្រប់ប្រភេទ ព្រមទាំងផ្តល់ប័ណ្ណកម្មសិទ្ធិជូនអ្នកកាន់កាប់ ដែលមានលក្ខណសម្បត្តិគ្រប់គ្រាន់តាមលក្ខខណ្ឌឲ្យបានចប់សព្វគ្រប់ជាស្ថាពរនៅក្នុងអាណត្តិទី៧នេះ។

ឯកឧត្តមភិបាលខេត្ត បានគូសបញ្ជាក់ថា នៅក្នុងខេត្តស្វាយរៀង នាពេលបច្ចុប្បន្ននេះ ដោយមានការជួយឧបត្ថម្ភគាំទ្រពីក្រសួងរៀបចំដែនដី នគរូបនីយកម្ម និងសំណង់ និងមានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ជាសេនាធិការ ក៏បាននិងកំពុងដឹកនាំ និងជំរុញការងារចុះបញ្ជីដីធ្លីដែលនៅសេសសល់ប្រមាណជា ៣១៨.០០០ក្បាល យ៉ាងសស្រាក់ស្រាំ និងសកម្មបំផុត។

ជាមួយគ្នានោះឯកឧត្តម នាយឧត្តមសេនីយ៍ សៅ សុខា ក៏បានថ្លែងអបអរសាទរចំពោះប្រជាពលរដ្ឋចំនួនពីរឃុំគឺឃុំជ្រៃធំ ឃុំកំពង់ត្រាច ស្រុករមាសហែក ដែលបានទទួលបណ្ណ័កម្មសិទ្ធិដីធ្លីនាពេលនេះ។ បើគ្មានការចូលរួមពីបងប្អូនប្រជាពលរដ្ឋក្នុងការធ្វើប័ណ្ណកម្មសិទ្ធិដីធ្លីនេះទេ ក្រុមការងារបច្ចេកទេសមិនអាចធ្វើការវាស់វែងបានទេ ដូច្នេះសូមអរគុណចំពោះប្រជាពលរដ្ឋ ក៏ដូចជាក្រុមការងារបច្ចេកទេសទាំងអស់ ដែលបានសហការគ្នាដោយរលូន ហើយទទួលបានប័ណ្ណកម្មសិទ្ធិជូនប្រជាពលរដ្ឋនៅថ្ងៃនេះ។ម្យ៉ាងវិញទៀតសូមបងប្អូនប្រជាពលរដ្ឋដទៃទៀត ដែលមិនទាន់បានទទួលបណ្ណ័កម្មសិទ្ធិដីធ្លី សូមយកគំរូតាមប្រជាពលរដ្ឋដែលបានទទួលបានបណ្ណ័កម្មសិទ្ធិដីធ្លីនាពេលនេះ និងចូលរួមសហការជាមួយក្រុមការងារបច្ចេកទេសឱ្យបានល្អ ដើម្បីទទួលបានប័ណ្ណកម្មសិទ្ធិជាបន្តបន្ទាប់ទៀត។

បន្ថែមលើសពីនេះ ឯកឧត្តម នាយឧត្តមសេនីយ៍ សៅ សុខា បានថ្លែងអបអរសាទរចំពោះជោគជ័យក្នុងការបោះឆ្នោតជ្រើសតាំងសមាជិកក្រុមប្រឹក្សារាជធានី ខេត្ត ស្រុក ក្រុង ខណ្ឌកាលពីថ្ងៃទី ២៦ ខែឧសភាកន្លងទៅនេះ ដែលបានបង្ហាញអំពីដំណើរការទៅក៏ដូចជាវឌ្ឍនភាពនៃការអនុវត្ត លទ្ធិប្រជាធិបតេយ្យសេរីពហុបក្ស បានដើរត្រឹមត្រូវទៅតាមគោលការណ៍ច្បាប់រដ្ឋធម្មនុញ្ញនិងច្បាប់បទដ្ឋាន ដែលទាក់ទងទៅដល់ដំណើរការអំណាចគ្រប់គ្រងរដ្ឋ។ លោកក៏បានណែនាំ ដល់ប្រជាពលរដ្ឋត្រូវប្រើប្រាស់ប័ណ្ណកម្មសិទ្ធិដីធ្លីនេះ ឲ្យបានត្រឹមត្រូវ និងមានប្រយោជន៍ដល់គ្រួសារ ជាពិសេសគឺទុកដាក់ឲ្យមានសុវត្ថិភាពនិងចៀសវាងធ្វើឱ្យខូចខាតដោយប្រការណាមួយ។

នៅក្នុងឱកាសនោះ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី បានថ្លែងថា: ការងារអាទិភាពមួយក្នុងចំណោមការងារអាទិភាពជាច្រើនរបស់ក្រសួង គឺធ្វើយ៉ាងណាជំរុញការចុះបញ្ជីដីធ្លី ឲ្យបានសម្រេចជាស្ថាពរក្នុងឱកាសនៃគម្រប់ខួបលើកទី៤០ នៃការចេញប័ណ្ណកម្មសិទ្ធិដីធ្លីជូនប្រជាពលរដ្ឋ។ ហើយការចុះបញ្ជីដីធ្លីគឺជាការផ្តល់នូវសិទ្ធិ សុវត្ថិភាព ផ្លូវច្បាប់ក្នុងការកាន់កាប់អចលនទ្រព្យស្របច្បាប់ដល់ប្រជាពលរដ្ឋរបស់យើង ការងារវាស់វែងចុះបញ្ជីដីធ្លីជូនប្រជាពលរដ្ឋនេះ ត្រូវបានសម្ដេចតេជោ ហ៊ុន សែន រៀបចំធ្វើឡើងតាំពីឆ្នាំ១៩៨៥ រហូតដល់ឆ្នាំ១៩៨៩ ទើបមានការចេញប័ណ្ណផ្ដល់សិទ្ធិឯកជន លើអចលនទ្រព្យ ជូនប្រជាពលរដ្ឋលើកទី១។ ដូច្នេះពីឆ្នាំ១៩៨៩ រហូតដល់ឆ្នាំ២០២៩ខាងមុខនេះ វានឹងឈានទៅដល់ខួបលើកទី៤០ នៃការចេញបានកម្មសិទ្ធិដីធ្លីរបស់មន្ត្រីរៀបចំដែនដីនគររូបនីយកម្ម និងសំណង់។

ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី បានលើកឡើងផងដែរថា មុននឹងឈានដល់ខួបលើកទី៤០ នៃការចេញបណ្ណ័កម្មសិទ្ធិដីធ្លី មន្ត្រីជំនាញ និងអង្គភាពពាក់ព័ន្ធ ត្រូវខិតខំប្រឹងប្រែងធ្វើការងារទាំងអស់គ្នា ដើម្បីបង្ហើយការងារ ចុះបញ្ជីដីធ្លី ក្នុងខេត្តស្វាយរៀង ក៏ដូចទូទាំងប្រទេស ឲ្យចប់សព្វគ្រប់បានឆាប់រហ័សផងដែរ។

ជាមួយនេះ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី ក៏បានថ្លែងនូវការកោតសរសើរដល់រដ្ឋបាលខេត្តស្វាយរៀង និងថ្លែងនូវការអរគុណចំពោះបងប្អូនប្រជាពលរដ្ឋ អាជ្ញាធរដែនដីគ្រប់លំដាប់ថ្នាក់ មន្ទីរជំនាញ ជាពិសេសមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តដែលជាប្រតិបត្តិករផ្ទាល់ និងអង្គភាពពាក់ព័ន្ធទាំងអស់ដែលបានខិតខំប្រឹងប្រែងចូលរួមទាំងកម្លាំងកាយចិត្តយ៉ាងមមាញឹក និងមិនខ្លាចពីការនឿយហត់ នៅក្នុងដំណើរការចុះបញ្ជីដីធ្លីលើគ្រប់នីតិវិធី និងគ្រប់ដំណាក់កាល ដើម្បីជំរុញការងារចេញប័ណ្ណសម្គាល់ម្ចាស់អចលនវត្ថុជូនប្រជាពលរដ្ឋឲ្យបានចេញជាផ្លែផ្កា នាពេលនេះផងដែរ៕

ដោយ:ភក្ដី