កិច្ចប្រជុំចម្រុះជាមួយភាគីពាក់ព័ន្ធ សម្រាប់ការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ ២០២៥
នាថ្ងៃទី១៩ ខែឧសភា ឆ្នាំ២០២៥នេះ លោក ម៉ែន អេង អភិបាលរងខេត្តស្វាយរៀង តំណាងដ៏ខ្ពង់ខ្ពស់ឯកឧត្តម ប៉េង ពោធិ៍សា អភិបាលខេត្ត បានអញ្ជេីញជាធិបតីក្នុងកិច្ចប្រជុំចម្រុះជាមួយភាគីពាក់ព័ន្ធ សម្រាប់ការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ ២០២៥ នៅសាលប្រជុំលេខាធិការដ្ឋានរៀបចំការបោះឆ្នោតខេត្តស្វាយរៀង។
ក្នុងពិធីនេះក៏មានការអញ្ជេីញចូលរួមពី លោក សុខ សាគុន ប្រធានលេខាធិការដ្ឋានរៀបចំការបោះឆ្នោតខេត្តស្វាយរៀង លោក ឯម សុត ជំនួយការ គ.ជ.ប ប្រធានការិយាល័យមន្ទីរអប់រំយុវជន និងកីឡាខេត្ត តំណាងអភិបាលក្រុង ស្រុកទាំង៨ យុវជន ស.ស.យ.ក និងលេខាធិការគណបក្សផ្សេងទៀតដែលបានចូលរួមសរុបប្រមាណ ៤៨នាក់។
ក្នុងឱកាសនោះផងដែរ លោក ម៉ែន អេង អភិបាលរងខេត្ត បានមានប្រសាសន៍ថា ការបោះឆ្នោតគឺជាបេះដូងនៃលទ្ធិប្រជាធិបតេយ្យ ដែលប្រទេសកម្ពុជាប្រកាន់ភ្ជាប់ជានិច្ចនូវការបោះឆ្នោតយ៉ាងត្រឹមត្រូវ និងយុត្តិធម៌ ។
ក្នុងនាមជាមន្ត្រីត្រូវតែចុះទៅឱ្យបានដល់មូលដ្ឋាន និងកៀកបងប្អូនប្រជាពលរដ្ឋហើយពិនិត្យមើលថាតើបងប្អូនរបស់យើងប្រាកដជាមានអត្តសញ្ញាណប័ណ្ណគ្រប់ៗគ្នាហើយឬនៅ ក្នុងការបោះឆ្នោតឆ្នាំខាងមុខ។
លោក ម៉ែន អេង ក៏បានស្នើដល់អាជ្ញាធរទាំង ៨ ក្រុង ស្រុក ក្នុងខេត្តស្វាយរៀង ឱ្យចុះទៅធ្វើស្ថិតិ បងប្អូនប្រជាពលរដ្ឋដែលខុសអត្តសញ្ញាណប័ណ្ណ ឬអស់សុពលភាព ឱ្យបានដឹងចំនួនពិតប្រាកដ ដើម្បីឱ្យមន្ត្រីជំនាញនៃស្នងការខេត្តស្វាយរៀងចាត់មន្ត្រីឱ្យចុះធ្វើអត្តសញ្ញាណប័ណ្ណតាមក្រុង ស្រុកនីមួយៗដើម្បីមានភាពងាយស្រួលដល់បងប្អូនប្រជាពលរដ្ឋនិងនៅពេលបោះឆ្នោតខាងមុខ។
No comments:
Post a Comment