កម្លាំងសាមគ្គីជាតិខ្មែរ មន្ទីរការងារបណ្តុះបណ្តាលវិជ្ជាជីវៈខេត្តស្វាយរៀង បាននិងកំពុងបន្តចូលរួមយ៉ាងសកម្ម ឧបត្ថម្ភគាំទ្រជាស្បៀង និងសម្ភារៈ ដេីម្បីរៀបចំផ្តល់ជូនដល់ជនភៀសសឹក នៅមណ្ឌលសុវត្ថិភាពកងវ៉ា ខេត្តបន្ទាយមានជ័យ
នៅថ្ងៃទី២៧ ខែធ្នូ ឆ្នាំ២០២៥ ក្នុងស្មារតីសាមគ្គីភាព និងការរួមសុខរួមទុក្ខជាមួយសហជនរួមជាតិ លោក អ៊ូរ សុខឿន ប្រធានមន្ទីរការងារបណ្តុះបណ្តាលនិងវិជ្ជាជីវៈខេត្តស្វាយរៀង បានដឹកនាំក្រុមការងារនៃមន្ទីរនាំយកស្បៀងអាហារ សម្ភារៈប្រើប្រាស់ និងគ្រឿងឧបភោគបរិភោគចាំបាច់ជាច្រើន ដើម្បីចែកជូនដល់បងប្អូនប្រជាពលរដ្ឋភៀសសឹកចំនួន៤០០គ្រួសារ ដែលកំពុងស្នាក់នៅមណ្ឌលសុវត្ថិភាពកងវ៉ា ក្រុងសិរីសោភ័ណ ខេត្តបន្ទាយមានជ័យ។
ក្នុងឱកាសជួបសំណេះសំណាលនោះលោក អ៊ូរ សុខឿន ប្រធានមន្ទីរការងារបណ្តុះបណ្តាល បានពាំនាំនូវការសួរសុខទុក្ខ និងការយកចិត្តទុកដាក់ខ្ពស់ចំពោះសុខទុក្ខរបស់បងប្អូនប្រជាពលរដ្ឋ "ក្នុងកាលៈទេសៈដែលប្រទេសជាតិកំពុងរងការគំរាមកំហែងលើបូរណភាពទឹកដី ស្មារតី 'ខ្មែរតែមួយ រួមគ្នាជួយខ្មែរ' គឺមានតម្លៃមិនអាចកាត់ថ្លៃបាន។ យើងត្រូវរួបរួមសាមគ្គីគ្នា ក្នុងគ្រាលំបាកត្រូវមានទុក្ខរួមទុក្ខ មានសុខរួមសុខ ដើម្បីការពារសន្តិភាព និងទឹកដីរបស់យើង។
លោក អ៊ូរ សុខឿន បានបញ្ជាក់ផងដែរថា: ចំពោះអំណោយស្បៀងនិងសម្ភារៈទាំងនេះ មន្ទីរបានរៀបចំគៀងគរពីរោងចក្រសហគ្រាស បងប្អូនកម្មករនិយោជិត សហជីព និងសប្បុរសជនក្នុងខេត្តស្វាយរៀង ដោយស្មារតីខ្មែរតែមួយរួមគ្នា ខ្មែរស្រឡាញ់ខ្មែរជួយគ្នា៕
ដោយ:ភក្ដី
No comments:
Post a Comment