កម្ពុជា-ចិន បន្តពង្រឹងកិច្ចសហប្រតិបត្តិការសេដ្ឋកិច្ច៖ រោងចក្រផលិតសំបកកង់រថយន្ត «វ៉ាន់លី ថាយអឺរ» សម្ពោធដាក់ឱ្យដំណើរការជាផ្លូវការនៅខេត្តស្វាយរៀង

                                                                             

 កម្ពុជា-ចិន បន្តពង្រឹងកិច្ចសហប្រតិបត្តិការសេដ្ឋកិច្ច៖ រោងចក្រផលិតសំបកកង់រថយន្ត «វ៉ាន់លី ថាយអឺរ» សម្ពោធដាក់ឱ្យដំណើរការជាផ្លូវការនៅខេត្តស្វាយរៀង

(ខេត្តស្វាយរៀង)៖ នៅព្រឹកថ្ងៃចន្ទ ទី១២ ខែមករា ឆ្នាំ២០២៦ ព្រះរាជាណាចក្រកម្ពុជាបានសម្រេចនូវសមិទ្ធផលសេដ្ឋកិច្ចដ៏ធំធេងថ្មីមួយទៀត តាមរយៈពិធីសម្ពោធដាក់ឱ្យដំណើរការជាផ្លូវការនូវ ក្រុមហ៊ុន វ៉ាន់លី ថាយអឺរ (ខេមបូឌា) ឯ.ក (WANLI TIRE (CAMBODIA) CO., LTD)។ ពិធីនេះត្រូវបានរៀបចំឡើងយ៉ាងអធិកអធម ស្ថិតក្នុងតំបន់សេដ្ឋកិច្ចពិសេស ស៊ីនបាវិត ស្រុកចន្ទ្រា ខេត្តស្វាយរៀង ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា។

សក្ខីភាពនៃចំណងមិត្តភាពដែកថែប កម្ពុជា-ចិន

ការសម្រេចចិត្តវិនិយោគបង្កើតរោងចក្រផលិតសំបកកង់រថយន្តដ៏ទំនើបនេះ គឺជាសក្ខីភាពសបញ្ជាក់ឱ្យឃើញយ៉ាងច្បាស់ពីចំណងកិច្ចសហប្រតិបត្តិការដ៏រឹងមាំ និងយូរអង្វែងរវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន។ គម្រោងនេះមិនត្រឹមតែជួយជំរុញដល់ការនាំចេញរបស់កម្ពុជាប៉ុណ្ណោះទេ ប៉ុន្តែថែមទាំងចូលរួមចំណែកយ៉ាងសំខាន់ក្នុងការអភិវឌ្ឍវិស័យឧស្សាហកម្មធុនធ្ងន់នៅក្នុងប្រទេស។

ជំនឿទុកចិត្តលើការដឹកនាំរបស់រាជរដ្ឋាភិបាល

វត្តមានរបស់ក្រុមហ៊ុន វ៉ាន់លី ថាយអឺរ នៅលើទឹកដីខេត្តស្វាយរៀង បានបង្ហាញយ៉ាងប្រត្យក្សអំពីការផ្តល់សេចក្តីទុកចិត្តយ៉ាងខ្លាំងពីសំណាក់វិស័យឯកជន និងវិនិយោគិនបរទេស មកលើសក្តានុពលសេដ្ឋកិច្ច និងសុខសន្តិភាពរបស់កម្ពុជា។ ជោគជ័យនេះ កើតចេញពីការដឹកនាំប្រកបដោយគតិបណ្ឌិត ភាពប៉ិនប្រសប់ និងចក្ខុវិស័យវែងឆ្ងាយរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការទាក់ទាញវិនិយោគផ្ទាល់ពីបរទេស (FDI) ដើម្បីបង្កើតការងារ និងបង្កើនចំណូលជូនប្រជាពលរដ្ឋ។

ក្នុងឱកាសនោះដែរ ឯកឧត្តមឧបនាយករដ្ឋមន្ត្រី ស៊ុន ចាន់ថុល រួមជាមួយគណៈប្រតិភូ និងតំណាងក្រុមហ៊ុន បានអញ្ជើញកាត់ខ្សែបូសម្ពោធជាផ្លូវការ និងបានដើរទស្សនកិច្ចដោយផ្ទាល់នៅតាមខ្សែសង្វាក់ផលិតកម្មក្នុងរោងចក្រ។ ឯកឧត្តមបានវាយតម្លៃខ្ពស់ចំពោះបច្ចេកវិទ្យាផលិតកម្ម និងស្តង់ដារគុណភាពរបស់ក្រុមហ៊ុន ដែលនឹងក្លាយជាចំណែកមួយក្នុងការលើកកម្ពស់កេរ្តិ៍ឈ្មោះផលិតផល «ផលិតនៅកម្ពុជា» (Made in Cambodia) លើឆាកអន្តរជាតិ។

គួរបញ្ជាក់ថា ពិធីនេះក៏មានការអញ្ជើញចូលរួមពីសំណាក់ថ្នាក់ដឹកនាំខេត្តស្វាយរៀង មន្ត្រីរាជការពាក់ព័ន្ធ និងតំណាងក្រុមហ៊ុនយ៉ាងច្រើនកុះករ ដែលសបញ្ជាក់ពីការគាំទ្រយ៉ាងពេញទំហឹងពីគ្រប់មជ្ឈដ្ឋានចំពោះគម្រោងវិនិយោគមួយនេះ៕

ដោយ:ភក្ដី