ឯកឧត្តម ឡុង សេង អញ្ជើញសំណេះសំណាល និងនាំយកអំណោយចែកជូនគ្រួសារកងទ័ព គ្រួសារភៀសសឹក និងប្រជាពលរដ្ឋខ្វះខាត ក្នុងសង្កាត់ព្រៃឆ្លាក់

 ឯកឧត្តម ឡុង សេង អញ្ជើញសំណេះសំណាល និងនាំយកអំណោយចែកជូនគ្រួសារកងទ័ព គ្រួសារភៀសសឹក និងប្រជាពលរដ្ឋខ្វះខាត ក្នុងសង្កាត់ព្រៃឆ្លាក់

(ខេត្តស្វាយរៀង)៖ នាព្រឹកថ្ងៃពុធ ទី២៥ ខែកុម្ភៈ ឆ្នាំ២០២៦ ឯកឧត្តម ឡុង សេង អនុរដ្ឋលេខាធិការក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានសង្កាត់ព្រៃឆ្លាក់ បានអញ្ជើញជាអធិបតីក្នុងពិធីសំណេះសំណាល និងចែកជូនអំណោយសប្បុរសធម៌ ដល់គ្រួសារកងទ័ព គ្រួសារភៀសសឹក និងប្រជាពលរដ្ឋដែលមានជីវភាពខ្វះខាត ក្នុងមូលដ្ឋានសង្កាត់ព្រៃឆ្លាក់ ក្រុងស្វាយរៀង។

ក្នុងឱកាសសំណេះសំណាលនោះ ឯកឧត្តមប្រធានក្រុមការងារ បានពាំនាំនូវការសួរសុខទុក្ខពីសំណាក់ថ្នាក់ដឹកនាំរាជរដ្ឋាភិបាល ជូនដល់បងប្អូនប្រជាពលរដ្ឋទាំងអស់។ ទន្ទឹមនឹងនោះ ឯកឧត្តមបានលើកឡើង និងសង្កត់ធ្ងន់លើចំណុចសំខាន់ៗមួយចំនួនរួមមាន៖

១.បញ្ហាព្រំដែន៖ ការតាមដាន និងរក្សាស្ថិរភាពតាមតំបន់ព្រំដែន។

២.សន្តិសុខ និងសណ្ដាប់ធ្នាប់៖ ការពង្រឹងភូមិ-សង្កាត់មានសុវត្ថិភាព ដើម្បីធានាបាននូវការរស់នៅដោយសុខសាន្តរបស់ប្រជាពលរដ្ឋក្នុងមូលដ្ឋាន។

ជាកិច្ចឆ្លើយតបទៅនឹងការលំបាករបស់បងប្អូនប្រជាពលរដ្ឋ ឯកឧត្តម ឡុង សេង បាននាំយកអំណោយមនុស្សធម៌ចែកជូនដល់គ្រួសារកងទ័ព គ្រួសារភៀសសឹក និងប្រជាពលរដ្ឋខ្វះខាតសរុបចំនួន ១២គ្រួសារ។ អំណោយដែលគ្រួសារនីមួយៗទទួលបានរួមមាន៖ គ្រឿងឧបភោគបរិភោគ និងថវិកាចំនួន ១០ម៉ឺនរៀល ដើម្បីជួយសម្រាលបន្ទុកជីវភាពប្រចាំថ្ងៃ។

សកម្មភាពនេះ បានបង្ហាញឱ្យឃើញពីការយកចិត្តទុកដាក់ខ្ពស់របស់ក្រុមការងាររាជរដ្ឋាភិបាល ចំពោះសុខទុក្ខ និងជីវភាពរស់នៅរបស់ប្រជាពលរដ្ឋនៅតាមមូលដ្ឋាន ជាពិសេសអ្នកដែលបានលះបង់ដើម្បីបុព្វហេតុជាតិមាតុភូមិ និងគ្រួសារដែលកំពុងជួបការលំបាកខ្លាំង៕ ដោយ:ភក្ដី