ឯកឧត្តម ប៉េង ពោធិ៍សា អភិបាលខេត្តស្វាយរៀង អញ្ជើញចូលរួមក្នុងពិធីបើកព្រឹត្តិការណ៍បុណ្យទន្លេលើកទី១០ ឆ្នាំ២០២៦ នៅខេត្តក្រចេះ

 ឯកឧត្តម ប៉េង ពោធិ៍សា អភិបាលខេត្តស្វាយរៀង អញ្ជើញចូលរួមក្នុងពិធីបើកព្រឹត្តិការណ៍បុណ្យទន្លេលើកទី១០ ឆ្នាំ២០២៦ នៅខេត្តក្រចេះ

ឯកឧត្តម ប៉េង ពោធិ៍សា អភិបាលខេត្តស្វាយរៀង បានអញ្ជើញចូលរួម ព្រឹត្តិការណ៍បុណ្យទន្លេលើកទី១០ ឆ្នាំ២០២៦ ក្រោមអធិបតីភាពដ៏ខ្ពង់ខ្ពស់ ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី ទទួលបន្ទុកជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន តំណាងដ៏ខ្ពង់ខ្ពស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃ ព្រះរាជាណាចក្រកម្ពុជា "ក្រោមប្រធានបទ ទន្លេបៃតង បេតិកភណ្ឌវប្បធម៍ និងធម្មជាតិមហាសាល" ថ្ងៃសៅរ៍ ទី២៨ ខែមីនា ឆ្នាំ២០២៦ នៅក្រុងក្រចេះ ខេត្តក្រចេះ និងមានការអញ្ជើញចូលរួមពីសំណាក់ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ ថ្នាក់ដឹកនាំក្រុមប្រឹក្សាខេត្ត រដ្ឋបាលខេត្ត និងថ្នាក់ដឹកនាំ មន្ត្រីរាជការ ភ្ញៀវជាតិ និងអន្តរជាតិ ជាច្រើននាក់។

វត្តមានរបស់ ឯកឧត្តមអភិបាលខេត្តស្វាយរៀង ក្នុងព្រឹត្តិការណ៍នេះ មិនត្រឹមតែជាការចូលរួមអបអរសាទរប៉ុណ្ណោះទេ ប៉ុន្តែថែមទាំងឆ្លុះបញ្ចាំងពីសាមគ្គីភាពរវាងរដ្ឋបាលខេត្ត និងខេត្ត ក្នុងកិច្ចសហប្រតិបត្តិការលើកស្ទួយវិស័យទេសចរណ៍ផ្ទៃក្នុង។ ព្រឹត្តិការណ៍នៅឆ្នាំនេះ រួមមានសកម្មភាពដ៏សម្បូរបែបដូចជា៖

 1. ការតាំងពិព័រណ៍ផលិតផលក្នុងស្រុក៖ ការបង្ហាញនូវសក្តានុពលកសិទេសចរណ៍ និងផលិតផលខ្មែរ (ភូមិមួយ ផលិតផលមួយ)។

 2. មហោស្រពម្ហូបអាហារ និងភេសជ្ជៈ៖ ការបង្ហាញរសជាតិម្ហូបអាហារប្រចាំតំបន់តាមដងទន្លេ។

 3. ការសម្តែងសិល្បៈ៖ ការបង្ហាញនូវមរតកវប្បធម៌អរូបី និងការប្រកួតកីឡាដើម្បីទាក់ទាញភ្ញៀវទេសចរ។

តាមរយៈការរៀបចំបុណ្យទន្លេនេះ រាជរដ្ឋាភិបាលកម្ពុជាមានបំណងជំរុញឲ្យមានការយកចិត្តទុកដាក់ខ្ពស់លើការថែរក្សាបរិស្ថាន "ភាពបៃតង" នៅតាមដងទន្លេ ដែលជាសរសៃឈាមសេដ្ឋកិច្ច និងវប្បធម៌ដ៏សំខាន់របស់ជាតិ។ ជាមួយគ្នានេះ វាក៏ជាឱកាសមាសក្នុងការផ្សព្វផ្សាយពី "ត្រីផ្សោតទន្លេមេគង្គ" និងតំបន់អេកូទេសចរណ៍ក្នុងខេត្តក្រចេះ ទៅកាន់ពិភពលោកផងដែរ។

ឯកឧត្តមអភិបាលខេត្ត និងគណៈប្រតិភូ ក៏បានអញ្ជើញទស្សនាស្តង់ពិព័រណ៍នានា និងស្វែងយល់ពីបទពិសោធន៍ថ្មីៗ ក្នុងការរៀបចំកម្មវិធីទេសចរណ៍ខ្នាតធំ ដើម្បីជាទុនសម្រាប់យកមកអភិវឌ្ឍ និងរៀបចំកម្មវិធីទាក់ទាញទេសចរណ៍នៅក្នុងខេត្តស្វាយរៀង នាពេលអនាគតផងដែរ៕

ដោយ: ភក្ដី