សកម្មភាពមនុស្សធម៌ដ៏កក់ក្តៅ ឯកឧត្តម ប៉េង ពោធិ៍សា ចាត់តំណាងចុះសួរសុខទុក្ខ និងប្រគល់រទេះជនពិការជូនគ្រួសារស្ត្រីមេម៉ាយដែលមានកូនពិការទាំង ៣នាក់

 

 សកម្មភាពមនុស្សធម៌ដ៏កក់ក្តៅ ឯកឧត្តម ប៉េង ពោធិ៍សា ចាត់តំណាងចុះសួរសុខទុក្ខ និងប្រគល់រទេះជនពិការជូនគ្រួសារស្ត្រីមេម៉ាយដែលមានកូនពិការទាំង ៣នាក់

 

ខេត្តស្វាយរៀង៖ «មិនទុកឱ្យពលរដ្ឋណាម្នាក់រស់នៅដោយឯកោ និងខ្វះការមើលថែនោះឡើយ» នេះគឺជាស្មារតីចម្បងរបស់រដ្ឋបាលខេត្តស្វាយរៀង។ ជាក់ស្តែង នៅរសៀលថ្ងៃទី២១ ខែមីនា ឆ្នាំ២០២៦ ក្រោមមនោសញ្ចេតនាអាណិតស្រឡាញ់ និងការគិតគូរយ៉ាងដិតដល់បំផុតពីសំណាក់ ឯកឧត្តម ប៉េង ពោធិ៍សា អភិបាលនៃគណៈអភិបាលខេត្តស្វាយរៀង លោកបានចាត់តំណាងចុះដល់ខ្នងផ្ទះដើម្បីជួយសម្រាលទុក្ខលំបាករបស់ប្រជាពលរដ្ឋ។ តំណាងដ៏ខ្ពង់ខ្ពស់របស់ឯកឧត្តមអភិបាលខេត្ត រួមមាន លោក ម៉ែន អេង និង លោក សុខ រស់ អភិបាលរងខេត្ត អមដំណើរដោយ លោក ប៉ែន សុវណ្ណនី ប្រធានមន្ទីរសង្គមកិច្ចខេត្ត បានអញ្ជើញចុះសួរសុខទុក្ខគ្រួសារលោកស្រី ប្រាក់ ចន្ថា អាយុ ៥០ឆ្នាំ ជាស្រ្តីមេម៉ាយដ៏រឹងមាំម្នាក់ ដែលកំពុងរស់នៅភូមិកណ្ដាល ឃុំខ្សែត្រ ស្រុកកំពង់រោទិ៍។

 

ជាអកុសល ក្នុងចំណោមកូន ៣នាក់របស់លោកស្រី សុទ្ធតែមានពិការភាព ដែលធ្វើឱ្យជីវភាពគ្រួសារជួបការលំបាកយ៉ាងខ្លាំង។ ដោយមើលឃើញពីទុក្ខលំបាកនេះ រដ្ឋបាលខេត្តបានសម្រេចផ្តល់ជូននូវ រទេះជនពិការចំនួន ៣គ្រឿង សម្រាប់ក្មួយៗទាំង ៣នាក់ (ឈ្មោះ តក់ ភារ៉ា, តក់ ធារី និង តក់ រាត្រី) ដើម្បីជាមធ្យោបាយសម្រួលដល់ការធ្វើចលនា និងការរស់នៅប្រចាំថ្ងៃឱ្យកាន់តែប្រសើរឡើង។

 

ក្នុងឱកាសដ៏មានអត្ថន័យនោះ លោកអភិបាលរងខេត្ត បានពាំនាំនូវបណ្ដាំផ្ញើសួរសុខទុក្ខ ប្រកបដោយក្ដីមេត្តាករុណាពីសំណាក់ ឯកឧត្តម ប៉េង ពោធិ៍សា ជូនដល់ក្រុមគ្រួសារទាំងមូល។ លោកបានសង្កត់ធ្ងន់ថា៖

«រដ្ឋបាលខេត្ត តែងតែនៅក្បែរ និងរួមសុខរួមទុក្ខជាមួយបងប្អូនជានិច្ច។ សូមឱ្យក្មួយៗទាំងអស់ កុំអស់សង្ឃឹម ត្រូវមានស្មារតីតស៊ូក្នុងជីវិត និងត្រូវថែរក្សាសុខភាពឱ្យបានល្អ ជាពិសេសត្រូវចេះថែទាំរទេះទាំងនេះ ដើម្បីប្រើប្រាស់ជាប្រយោជន៍បានយូរអង្វែង។»

 

សកម្មភាពនេះ បានសបញ្ជាក់ឱ្យឃើញយ៉ាងច្បាស់ពី ការយកចិត្តទុកដាក់ខ្ពស់របស់ថ្នាក់ដឹកនាំខេត្តស្វាយរៀង ដែលតែងតែផ្តល់អាទិភាពដល់សុខុមាលភាពប្រជាពលរដ្ឋ ជាពិសេសជនងាយរងគ្រោះ ដើម្បីឱ្យពួកគាត់មានក្តីសង្ឃឹម និងស្នាមញញឹមក្នុងជីវិតឡើងវិញ។