ស្នាមញញឹមតាមរថយន្តក្រុងឥតគិតថ្លៃ និងការយកចិត្តទុកដាក់ពីរដ្ឋបាលខេត្តស្វាយរៀង ក្នុងឱកាសបុណ្យចូលឆ្នាំថ្មី

ស្នាមញញឹមតាមរថយន្តក្រុងឥតគិតថ្លៃ និងការយកចិត្តទុកដាក់ពីរដ្ឋបាលខេត្តស្វាយរៀង ក្នុងឱកាសបុណ្យចូលឆ្នាំថ្មី

(ខេត្តស្វាយរៀង): នៅក្រោមពន្លឺថ្ងៃនាដើមខែចេត្រ ខណៈដែលពិធីបុណ្យចូលឆ្នាំថ្មីប្រពៃណីជាតិខ្មែរជិតចូលមកដល់ ទីធ្លានៅខាងមុខសាខាកាកបាទក្រហមកម្ពុជាខេត្តស្វាយរៀង មានសភាពអ៊ូអរខុសពីធម្មតា។ សំឡេងសើចសប្បាយ រួមជាមួយការរៀបចំសម្ភារៈធ្វើដំណើររបស់បងប្អូនប្រជាពលរដ្ឋ បានបង្កើតជាទិដ្ឋភាពដ៏កក់ក្តៅមួយ ក្រោមការរៀបចំសម្របសម្រួលពីរដ្ឋបាលខេត្តស្វាយរៀង។

ដើម្បីសម្រួលដល់បន្ទុកចំណាយ និងបង្កលក្ខណៈងាយស្រួលដល់ប្រជាពលរដ្ឋដែលធ្វើការនៅតាមបណ្តារាជធានី-ខេត្ត ឱ្យបានត្រឡប់មកជួបជុំក្រុមគ្រួសារ រដ្ឋបាលខេត្តស្វាយរៀងបានបញ្ចេញរថយន្តក្រុងចំនួន ១២គ្រឿង ដើម្បីបម្រើសេវាដឹកជញ្ជូនសាធារណៈដោយ ឥតគិតថ្លៃ។ នេះមិនត្រឹមតែជាការជួយផ្នែកសេដ្ឋកិច្ចប៉ុណ្ណោះទេ ប៉ុន្តែគឺជាការសាយភាយនូវទឹកចិត្តសប្បុរស និងការគិតគូរខ្ពស់ពីសុខុមាលភាពរបស់ពលរដ្ឋក្នុងមូលដ្ឋាន។

នាព្រឹកថ្ងៃទី១៣ ខែមេសានេះ ក្រុមការងារមន្ទីរព័ត៌មានខេត្ត បានចុះជួបសម្ភាសន៍ផ្ទាល់ជាមួយអ្នកដំណើរ ដែលកំពុងរង់ចាំឡើងរថយន្តទៅកាន់ស្រុកកំណើត៖

ខ្ញុំពិតជាត្រេកអរខ្លាំងណាស់! រាល់ឆ្នាំត្រូវចំណាយលុយច្រើនលើថ្លៃឡានឈ្នួល ហើយជួនកាលឡានឡើងថ្លៃទៀត។ ឆ្នាំនេះបានជិះឡានក្រុងខេត្ត មិនត្រឹមតែមិនអស់លុយទេ តែឡានមានម៉ាស៊ីនត្រជាក់ ជិះស្រួល ហើយមានសុវត្ថិភាពទៀត។ អរគុណដល់រដ្ឋបាលខេត្តខ្លាំងណាស់ដែលបានគិតគូរដល់ពួកខ្ញុំ។

សម្រាប់ពួកខ្ញុំដែលជាអ្នកធ្វើការរោងចក្រ ការសន្សំសំចៃគឺជារឿងសំខាន់។ ការមានរថយន្តក្រុងឥតគិតថ្លៃបែបនេះ ជួយឱ្យខ្ញុំសល់លុយមួយចំណែកទិញនំចំណីជូនពុកម៉ែនៅផ្ទះ។ ខ្ញុំមានអារម្មណ៍ថាកក់ក្តៅ ដែលអាជ្ញាធរលោកតែងតែនៅក្បែរ និងជួយសម្រួលការលំបាករបស់ពួកយើងគ្រប់ពេលបុណ្យទាន។

តាមរយៈការរៀបចំនេះ រដ្ឋបាលខេត្តស្វាយរៀងបានបង្ហាញឱ្យឃើញពីប្រសិទ្ធភាពនៃការគ្រប់គ្រង និងការផ្តល់សេវាសាធារណៈឱ្យខិតជិតប្រជាពលរដ្ឋ។ រថយន្តក្រុងទាំង ១២គ្រឿង ត្រូវបានបែងចែកគោលដៅយ៉ាងច្បាស់លាស់ ទៅកាន់គ្រប់បណ្តាក្រុង-ស្រុកទាំងអស់ក្នុងខេត្ត ចាប់ពីថ្ងៃទី១២ រហូតដល់ថ្ងៃទី១៧ ខែមេសា ឆ្នាំ២០២៦។

សកម្មភាពដឹកជញ្ជូនឥតគិតថ្លៃនេះ គឺជាកាដូដ៏មានអត្ថន័យបំផុតសម្រាប់ប្រជាពលរដ្ឋខេត្តស្វាយរៀង។ វាមិនត្រឹមតែនាំពួកគេទៅដល់ផ្ទះដោយសុវត្ថិភាពប៉ុណ្ណោះទេ ប៉ុន្តែវាថែមទាំងបានដឹកនាំនូវក្តីស្រឡាញ់ និងការយកចិត្តទុកដាក់ពីរាជរដ្ឋាភិបាល និងអាជ្ញាធរខេត្ត ទៅដល់គ្រប់មហាគ្រួសារខ្មែរក្នុងឱកាសមហាសង្ក្រាន្តនេះផងដែរ៕

ដោយ: ភក្ដី