រដ្ឋបាលខេត្តស្វាយរៀង និងក្រសួងកសិកម្ម រុក្ខាប្រមាញ់ និងនេសាទ ពិភាក្សាលើសំណើសុំប្រើប្រាស់ដីទំហំ ២៤២ហិកតា ក្នុងស្រុករមាសហែក សម្រាប់វិស័យយុទ្ធសាស្ត្រចំនួន ៤

រដ្ឋបាលខេត្តស្វាយរៀង និងក្រសួងកសិកម្ម រុក្ខាប្រមាញ់ និងនេសាទ ពិភាក្សាលើសំណើសុំប្រើប្រាស់ដីទំហំ ២៤២ហិកតា ក្នុងស្រុករមាសហែក សម្រាប់វិស័យយុទ្ធសាស្ត្រចំនួន ៤

នៅព្រឹកថ្ងៃទី២០ ខែឧសភា ឆ្នាំ២០២៦ នៅសាលប្រជុំព្រៃបាសាក់ (អគារ ខ) សាលាខេត្តស្វាយរៀង បានរៀបចំកិច្ចប្រជុំពិភាក្សាការងារយ៉ាងយកចិត្តទុកដាក់ ស្ដីពីសំណើសុំប្រើប្រាស់ដីទំហំ ២៤២ហិកតា ស្ថិតក្នុងស្រុករមាសហែក ខេត្តស្វាយរៀង ដើម្បីបម្រើឱ្យវិស័យអប់រំ បណ្តុះបណ្តាលវិជ្ជាជីវៈ សង្គមកិច្ច និងវិស័យការពារជាតិ ដែលកិច្ចប្រជុំនេះ បានប្រព្រឹត្តទៅក្រោមអធិបតីភាពរបស់ ឯកឧត្តម ចាន់ ជេស្តា រដ្ឋលេខាធិការ តំណាងដ៏ខ្ពង់ខ្ពស់របស់ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និង លោក ម៉ែន អេង អភិបាលរងខេត្ត តំណាងដ៏ខ្ពង់ខ្ពស់របស់ឯកឧត្តម ប៉េង ពោធិ៍សា អភិបាលនៃគណៈអភិបាលខេត្តស្វាយរៀង។

នៅក្នុងកិច្ចប្រជុំនោះដែរលោក ម៉ែន អេង អភិបាលរងខេត្ត បានមានប្រសាសន៍សំណេះសំណាលបើកកិច្ចប្រជុំ ដោយបានលើកឡើងយ៉ាងច្បាស់អំពីសារៈសំខាន់ និងគោលបំណងយុទ្ធសាស្ត្រនៃការស្នើសុំប្រើប្រាស់ដីខាងលើ ដើម្បីឆ្លើយតបទៅនឹងការអភិវឌ្ឍសេដ្ឋកិច្ច-សង្គមក្នុងខេត្ត។ ក្នុងឱកាសនោះ លោកអភិបាលរងខេត្ត បានពាំនាំនូវប្រសាសន៍ផ្តាំផ្ញើដ៏ខ្ពង់ខ្ពស់របស់ឯកឧត្តម ប៉េង ពោធិ៍សា អភិបាលខេត្តស្វាយរៀង ដែលបានសង្កត់ធ្ងន់ថា៖ «ការអភិវឌ្ឍលើវិស័យទាំង ៤ នេះ គឺជាតម្រូវការចាំបាច់មិនអាចខ្វះបាន ដើម្បីលើកកម្ពស់គុណភាពជីវិតជូនប្រជាពលរដ្ឋក្នុងមូលដ្ឋានស្រុករមាសហែក ដូច្នេះរដ្ឋបាលខេត្តមានការប្តេជ្ញាចិត្តខ្ពស់ក្នុងការសម្រេចឱ្យបាននូវគម្រោងនេះ ដើម្បីបម្រើផលប្រយោជន៍សាធារណៈ និងធានាបាននូវការរីកចម្រើនប្រកបដោយចីរភាព»។

ទន្ទឹមនឹងនេះដែរឯកឧត្តម ចាន់ ជេស្តា រដ្ឋលេខាធិការ បានពាំនាំនូវប្រសាសន៍ណែនាំរបស់ឯកឧត្តមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ពាក់ព័ន្ធនឹងការគ្រប់គ្រងដីធ្លីឱ្យមានប្រសិទ្ធភាព និងស្របច្បាប់។ ឯកឧត្តមបានផ្តល់ឱកាសដល់ក្រុមការងារជំនាញបង្ហាញពីសាវតា ប្រវត្តិដី និងស្នើឱ្យអង្គភាពស្នើសុំទាំង ៤ បកស្រាយឱ្យបានច្បាស់លាស់ពីកម្មវត្ថុ និងអត្ថប្រយោជន៍ដែលរំពឹងទុក។

ក្រោយពីបានស្តាប់ការធ្វើបទបង្ហាញយ៉ាងលម្អិតអំពីកម្មវត្ថុ និងអត្ថប្រយោជន៍ពីតំណាងអង្គភាពទាំង ៤ រួចមក លោក ម៉ែន អេង អភិបាលរងខេត្ត បានគូសបញ្ជាក់បន្ថែមយ៉ាងក្បោះក្បាយថា ការស្នើសុំដីនេះគឺជាយុទ្ធសាស្ត្ររយៈពេលវែងរបស់ខេត្ត ដែលនឹងក្លាយជាកាតាលីករដ៏សំខាន់ក្នុងការជំរុញឱ្យតំបន់នេះមានការរីកចម្រើនយ៉ាងឆាប់រហ័ស ទាំងផ្នែកធនធានមនុស្ស សុខុមាលភាពសង្គម និងសន្តិសុខសណ្តាប់ធ្នាប់។

ជាការឆ្លើយតប ឯកឧត្តម ចាន់ ជេស្តា រដ្ឋលេខាធិការ បានបង្ហាញការយល់ស្របចំពោះភាពចាំបាច់នៃគម្រោងនេះ ហើយបានបញ្ជាក់ថា នឹងទទួលយកសំណើ និងការបកស្រាយលម្អិតទាំងអស់ ដើម្បីរៀបចំរបាយការណ៍ជូនឯកឧត្តមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ពិនិត្យ និងសម្រេចតាមនីតិវិធីបន្តយ៉ាងយកចិត្តទុកដាក់បំផុត។

ជាទីបញ្ចប់ កិច្ចប្រជុំបានបិទបញ្ចប់ទៅដោយភាពជោគជ័យ និងពោរពេញដោយស្មារតីទទួលខុសត្រូវខ្ពស់ពីគ្រប់ភាគីពាក់ព័ន្ធ។ ថ្នាក់ដឹកនាំនៃអង្គប្រជុំ បានឯកភាពគ្នាយ៉ាងមុតមាំក្នុងការខិតខំប្រឹងប្រែងរួមគ្នា ដើម្បីសម្រេចឱ្យបាននូវការអភិវឌ្ឍនេះ ស្របតាមទិសដៅ និងយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាលកម្ពុជា ក្នុងការកសាងមូលដ្ឋានគ្រឹះដ៏រឹងមាំសម្រាប់ជំរុញកំណើនសេដ្ឋកិច្ច ការបង្កើតការងារ ការធានាសមធម៌ និងការកាត់បន្ថយភាពក្រីក្រ ដើម្បីឈានឆ្ពោះទៅសម្រេចចក្ខុវិស័យកម្ពុជាឆ្នាំ២០៣០ និង២០៥០។