ជោគជ័យដ៏ត្រចះត្រចង់នៃបេសកកម្មការទូតសេដ្ឋកិច្ចរបស់អភិបាលខេត្តស្វាយរៀង នៅខេត្តសានដុង នៃប្រទេសចិន ក្នុងការទាក់ទាញក្រុមហ៊ុនវិនិយោគធំៗពីរមកកាន់ខេត្តស្វាយរៀង

 ជោគជ័យដ៏ត្រចះត្រចង់នៃបេសកកម្មការទូតសេដ្ឋកិច្ចរបស់អភិបាលខេត្តស្វាយរៀង នៅខេត្តសានដុង នៃប្រទេសចិន ក្នុងការទាក់ទាញក្រុមហ៊ុនវិនិយោគធំៗពីរមកកាន់ខេត្តស្វាយរៀង

   (ខេត្តស្វាយរៀង)៖ ថ្ងៃពុធ ទី២៧ ខែឧសភា ឆ្នាំ២០២៦ បេសកកម្មការទូតសេដ្ឋកិច្ច និងការស្វែងរកដៃគូវិនិយោគរបស់ឯកឧត្តម ប៉េង ពោធិ៍សា អភិបាលនៃគណៈអភិបាលខេត្តស្វាយរៀង ទៅកាន់ខេត្តសានដុង នៃសាធារណរដ្ឋប្រជាមានិតចិន ទទួលបានលទ្ធផលផ្លែផ្កាយ៉ាងត្រចះត្រចង់ និងជោគជ័យយ៉ាងខ្ពស់ ក្នុងការទាក់ទាញទំនុកចិត្តពីបណ្តាវិនិយោគិនបរទេសធំៗ ដើម្បីមកបណ្តាក់ទុនធ្វើអាជីវកម្មនៅក្នុងទឹកដីនៃខេត្តស្វាយរៀង ព្រះរាជាណាចក្រកម្ពុជា។

   ជាលទ្ធផលជាក់ស្តែងរដ្ឋបាលខេត្តស្វាយរៀងបានទទួលស្វាគមន៍យ៉ាងកក់ក្តៅចំពោះការសម្រេចចិត្តប្រកបដោយការប្តេជ្ញាចិត្តខ្ពស់របស់ក្រុមហ៊ុនឧស្សាហកម្មលំដាប់អន្តរជាតិចំនួនពីរ ដែលបានឈានជើងមកចុះកិច្ចព្រមព្រៀងវិនិយោគជាផ្លូវការនៅក្នុងតំបន់សេដ្ឋកិច្ចពិសេសឈីលូ (Qilu SEZ)ខេត្តស្វាយរៀង។

   សមាសភាពក្រុមហ៊ុនធំៗទាំងពីរ ដែលបានសម្រេចចិត្តបណ្តាក់ទុនរួមមាន៖
១. Shanghai Qixiang New Materials Technology Co., Ltd.
២. Runze Packing Materials Co., Ltd.

   ការបោះជំហានទៅមុខយ៉ាងសំខាន់មួយនេះ គឺជាការប្តេជ្ញាចិត្តរួមគ្នាក្នុងការពង្រឹងកិច្ចសហប្រតិបត្តិការសេដ្ឋកិច្ច និងការអភិវឌ្ឍវិស័យឧស្សាហកម្មរវាងប្រទេសទាំងពីរ ឱ្យកាន់តែរឹងមាំថែមមួយកម្រិតទៀត។ 
ជាងនេះទៅទៀត វាក៏ជាកម្លាំងចលករយ៉ាងខ្លាំងក្លាក្នុងការបង្កើតឱកាសការងារយ៉ាងច្រើនសន្ធឹកសន្ធាប់ និងលើកកម្ពស់ជីវភាពរស់នៅជូនដល់ប្រជាពលរដ្ឋនៅក្នុងខេត្តស្វាយរៀងផ្ទាល់។

   តាមរយៈការដឹកនាំប្រកបដោយចក្ខុវិស័យវែងឆ្ងាយរបស់ ឯកឧត្តម ប៉េង ពោធិ៍សា ក្នុងការជំរុញសក្តានុពលសេដ្ឋកិច្ចខេត្ត តំបន់សេដ្ឋកិច្ចពិសេសឈីលូ (Qilu SEZ) នឹងបន្តពង្រីកវិសាលភាពរបស់ខ្លួនក្លាយជាមជ្ឈមណ្ឌលឧស្សាហកម្មដ៏មានឥទ្ធិពល និងជាគោលដៅវិនិយោគប្រកបដោយភាពទាក់ទាញបំផុត ស្របតាមគោលនយោបាយយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា៕
ដោយ: ភក្ដី