(ស្វាយរៀង)៖ នៅថ្ងៃទី២៨ ខែសីហា
ឆ្នាំ២០១៨នេះ ឯកឧត្តម ម៉ែន វិបុល អភិបាល នៃគណៈអភិបាលខេត្តស្វាយរៀង
បានដឹកនាំក្រុមការងារចម្រុះ ដោយមានការចូលរួមពីឯកឧត្ដមសមាជិកក្រុមប្រឹក្សាខេត្ត
លោកប្រធានមន្ទីរ អង្គភាពជំនាញពាក់ព័ន្ធនានាក្នុងខេត្ត
លោកនាយករងទីចាត់ការហិរញ្ញវត្ថុសាលាខេត្ត និងក្រុមប្រឹក្សាឃុំបាសាក់ អញ្ជើញចុះពិនិត្យការស្ថាបនាផ្លូវបេតុង
១ខ្សែ ប្រវែង ៤គ.ម ចូលទៅកាន់រមណីយដ្ឋានប្រាសាទបាសាក់ ស្ថិតនៅភូមិបាសាក់ ឃុំបាសាក់
ស្រុកស្វាយជ្រំ ខេត្តស្វាយរៀង ។ មានប្រសាសន៍ក្នុងឱកាសនោះ ឯកឧត្ដមអភិបាលខេត្ត
បានបញ្ជាក់ថា ការស្ថាបនាផ្លូវបេតុងចូលរមណីយដ្ឋានប្រាសាទបាសាក់ ដែលបច្ចុប្បន្នបាននិងកំពុងដំណើរការសាងសង់សម្រេចបាន
ប្រមាណជា ៦៥% នេះ
គឺជាគម្រោងកែលម្អហេដ្ឋារចនាសម្ព័ន្ធផ្លូវគមនាគមន៍សម្រាប់គាំទ្រដល់ផែនការរបស់រដ្ឋបាលខេត្តក្នុងការអភិវឌ្ឍ
និងកែច្នៃរមណីយដ្ឋានប្រាសាទបាសាក់ឲ្យក្លាយជាតំបន់ទេសចរណ៍
ស្របទៅនឹងស្ថានភាពអំណោយផលនៃទីតាំងតំបន់នេះដែលមានលក្ខណៈធម្មជាតិ និងប្រវត្តិសាស្រ្ត
។
ជាមួយនេះ ឯកឧត្ដមអភិបាលខេត្ត បានមានប្រសាសន៍បន្ថែមថា
ការស្ថាបនាផ្លូវចូលរមណីយដ្ឋាននេះគឺគ្រាន់តែជាគម្រោងទី១ប៉ុណ្ណោះមិនមែនជាគម្រោងចុងក្រោយនោះទេ
ហើយគម្រោងជាបន្តគឺខេត្តនឹងរៀបចំកែលម្អ និងស្ថាបនាផ្លូវបន្ថែមទៀតទាំងក្នុងបរិវេណ
និងនៅជុំវិញរមណីយដ្ឋាន ដើម្បីបង្កភាពងាយស្រួលដល់បងប្អូនប្រជាពលរដ្ឋ
ក៏ដូចជាភ្ញៀវទេសចរណ៍ជាតិ និងអន្តរជាតិ ធ្វើដំណើរមកលេងកម្សាន្តនៅតំបន់នេះ ព្រោះថា
បើទោះបីជាយើងបានរៀបចំ ឬក៏កែច្នៃឲ្យបានស្អាតល្អប្រកបដោយភាពទាក់ទាញយ៉ាងណាក៏ដោយ
ប៉ុន្តែបើគ្មានផ្លូវ ឬក៏មានផ្លូវដែរតែពិបាកក្នុងការធ្វើដំណើរនោះ
ក៏នឹងពុំមានអ្នកណាគេចង់មកលេងនោះដែរ ។ សូមបញ្ជាក់ថា បច្ចុប្បន្ននេះ
ឯកឧត្ដមអភិបាលខេត្ត បានដាក់ចេញនូវផែនការក្នុងការកែច្នៃ
និងអភិវឌ្ឍន៍រមណីយដ្ឋានប្រាសាទបាសាក់នេះឲ្យក្លាយទៅជាតំបន់ទេសចរណ៍ធម្មជាតិ
និងប្រវត្តិសាស្ត្រ ក្នុងន័យអភិរក្សរក្សាការពារនូវទីតាំងវប្បធម៍ប្រវត្តិសាស្ត្រ
ដែលដូនតាខ្មែរបានបន្សល់ទុកតាំងពីបុរាណកាលយូរលង់មកហើយឲ្យបានគង់វង្សផង
និងដើម្បីលើកកម្ពស់វិស័យទេសចរណ៍ក្នុងខេត្តផង
ធ្វើយ៉ាងណាឲ្យតំបន់នេះក្លាយជាគោលដៅទេសចរណ៍ដ៏ចម្បងរបស់ខេត្ត ចូលរួមចំណែកលើកកម្ពស់សេដ្ឋកិច្ចមូលដ្ឋាន
និងជីវភាពរស់នៅរបស់ប្រជាពលរដ្ឋ ៕
រក្សាសិទ្ធិដោយ៖ មន្ទីរព័ត៌មានខេត្តស្វាយរៀង
No comments:
Post a Comment