ឯកឧត្ដម តូច ប៉ូលីវ៉ា ជួបសំណេះសំណាល និងនាំយកថវិកា គ្រឿងឧបភោគបរិភោគ ជូនដល់បងប្អូនកីឡាករទូក«ង»ខេត្តស្វាយរៀង

(ស្វាយរៀង)៖ នៅរសៀលថ្ងៃទី២០ ខែវិច្ឆិកា ឆ្នាំ២០១៨

ឯកឧត្ដម តូច ប៉ូលីវ៉ា អភិបាលរងខេត្ត និងជាប្រធានគណៈកម្មការដឹកនាំនិងគ្រប់គ្រងទូកងខេត្ត តំណាងឯកឧត្ដម ម៉ែន វិបុល អភិបាល នៃគណៈអភិបាលខេត្តស្វាយរៀង បានចូលរួមជួបសំណេះសំណាល និងនាំយកថវិកា គ្រឿងឧបភោគបរិភោគ ដែលទទួលបានការឧបត្ថម្ភគាំទ្រពីសំណាក់លោកជំទាវគតិសង្ហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច និងថ្នាក់ដឹកនាំខេត្ត ព្រមទាំងសប្បុរសជន ជូនដល់បងប្អូនកីឡាករទូក«ង»ខេត្តស្វាយរៀង (ទូក ឌីសែនជ័យបារមីបូពារ៍ និងទូក សាឯមសែនជ័យបារមីស្វាយជ្រំ) ។

ព្រមជាមួយគ្នាឯឧប្រធានក៏បានផ្ដាំផ្ញើដល់កីឡាករអោយអនុវត្តអោយបាននូវការងារមួយចំនួន ៖

•ប្រធានក្រុមកីឡាករទាំងពីរទូកត្រូវគ្រប់គ្រងកីឡាករចំណុះទូកអោយបានច្បាស់លាស់ និងមានសាមគ្គីភាព ត្រូវចេះគោរពស្រឡាញ់គ្នា

•កីឡាករទូកត្រូវគោរពវិន័យបទបញ្ជាការប្រកួតអោយបានត្រឹមត្រូវពិសេសពេលអ៊ុទូកត្រូវមានសណ្តាប់ធ្នាប់ហាមអុំកាត់ទីលានទន្លេពេលប្រណាំង

•ត្រូវចូលរួមគ្រប់កម្មវិធីដែលកំណត់ដោយគណៈកម្មការប្រកួត ពិសេសចូលរួមពិធីកាត់ព្រ័ត្រ

•ត្រូវរក្សាអនាម័យ និងសុខភាពអោយបានល្អ ពោលគឺ ហូបស្អាត ផឹកស្អាត រស់នៅស្អាត ជាពិសេសកុំពិសារគ្រឿងស្រវឹង

•ត្រូវម្ចាស់ការលើការសំអាតកន្លែងស្នាក់នៅ និងបង្គន់អនាម័យអោយបានល្អ ៕ ដោយ៖ភក្ដី