ក្មួយៗកុមារកំព្រាចំនួន១០៦នាក់ នៅមណ្ឌលនានាក្នុងខេត្តស្វាយរៀង ទទួលបានសម្ភារសិក្សា ថវិការ និងអារហារសាមគ្គី ពីលោកជំទាវ ឌី សុខីទីឃាយុកោ

(ស្វាយរៀង)៖  ឯកឧត្ដម ម៉ែន វិបុល អភិបាលខេត្តស្វាយរៀង លោកជំទាវ ឌី សុខីទីឃាយុកោ  និងកញ្ញា ឌី សុភ័ក្របញ្ញា ព្រមទាំងក្រុមការងារ បានអញ្ជើញចុះជួបសំណេះសំណាល និងសួរសុខទុក្ខ រៀបចំអាហារសាមគ្គីជូនក្មួយៗកុមារកំព្រា ដែលកំពុងស្នាក់នៅមណ្ឌលនានាក្នុងខេត្ត នៅថ្ងៃទី១៥ ខែធ្នូ ឆ្នាំ២០១៨នេះ ។

ឯកឧត្ដម ម៉ែន វិបុល បានពាំនាំនូវការផ្ដាំផ្ញើសួរសុខទុក្ខពីសំណាក់សម្ដេចតេជោនាយករដ្ឋមន្ត្រី តែងតែគិតគូរពីសុខទុក្ខ ផ្ដល់នូវភាពកក់ក្ដៅ តាមរយៈការជួយឧបត្ថម្ភទាំងសម្ភារ ថវិកា គាំទ្រ និងលើកទឹកដល់ក្មួយៗកុមារកំព្រាទាំងអស់នៅទូទាំងប្រទេស ក៏ដូចជានៅខេត្តស្វាយរៀង ឯកឧត្ដមក៏បានលើកឡើងទៅកាន់ក្មួយៗទាំងអស់ថា ការពិតក្មួយៗកំព្រាឳពុកម្តាយមែន តែចិត្តក្មួយៗមិនកំព្រាទេ ព្រោះក្មួយៗមានសម្ដេចទាំងពីរ មានឯកឧត្ដម លោកជំទាវ អាជ្ញាធរគ្រប់លំដាប់ថ្នាក់ និងមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តស្វាយរៀង តែងតែនៅក្បែរក្មួយៗជានិច្ច ដើម្បីដោះស្រាយការលំបាក និងក្តីកង្វល់នានារបស់ក្មួយៗ ដូចជាកម្មវិធីនៅថ្ងៃនេះ ជាក់ស្ដែងគឺត្រូវបានប្រារព្ធឡើងជារៀងរាល់ឆ្នាំ ហើយនឹងនៅតែបន្តប្រារព្ធជូនក្មួយៗនាឆ្នាំក្រោយៗទៀត ។

នៅក្នុងឱកាសនោះលោកជំទាវ ឌី សុខីទីឃាយុកោ ក៏បានផ្តាំផ្ញើដល់ក្មួយទាំងអស់ ត្រូវខិតខំរៀនសូត្រ គោរពតាមការណែនាំរបស់ប្រធានមជ្ឈមណ្ឌល លោកគ្រូ អ្នកគ្រូ និងត្រូវមាន សីលធម៌ សុជីវធម៌ គុណធម៌ ដើម្បីឲ្យក្លាយជាពលរដ្ឋគំរូ ជាទំពាំងស្នងឬស្សី និងជាធនធានសម្រាប់រួមចំណែកក្នុងការអភិវឌ្ឍប្រទេសជាតិ ។

នៅចុងបញ្ចប់នៃកម្មវិធីលោកជំទាវ ឌី សុខីទីឃាយុកោ និងក្រុមការងារ ក៏បានចែកជូននូវសម្ភារៈសិក្សា និងថវិកាដល់ក្មួយៗកុមារកំព្រាចំនួន ១០៦នាក់ ក្នុងម្នាក់ៗ ទទួលបានសម្ភារះសិក្សា និងឃីត ១កញ្ចប់ ព្រមទាំងថវិកា ៥ម៉ឺនរៀល ចំណែកអ្នកគ្រប់គ្រងមណ្ឌល ម៉ែដោះ និងអ្នកបើកបរ ក្នុងម្នាក់ៗ ទទួលបានឃីត ១កញ្ចប់ និងថវិកា ៥ម៉ឺនរៀលផងដែរ ៕ ដោយ៖ភក្ដី