កិច្ចប្រជុំពិភាក្សាការងារយុទ្ធិសាស្ត្រលើកិច្ចគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវៈចម្រុះ និងការអភិវឌ្ឍដោយចីរភាព នៅមន្ទីរបរិស្ថានខេត្តស្វាយរៀង

(ស្វាយរៀង)៖ ក្រោមអធិបភាពឯកឧត្តម តូច ប៉ូលីវ៉ា អភិបាលរងខេត្តស្វាយរៀង លោកជំទាវ ព្រំ សុភី អនុរដ្ឋលេខាធិការក្រសួងបរិស្ថាន បានអញ្ជើញចូលរួមកិច្ចប្រជុំពិភាក្សាការងារយុទ្ធិសាស្ត្រលើកិច្ចគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវៈចម្រុះ និងការអភិវឌ្ឍដោយចីរភាព នៅថ្ងៃទី១៦ ខែមករា ឆ្នាំ២០១៩ ដោយមានការអញ្ជើញចូលរួមពី ឯកឧត្តម លោក លោកស្រី ប្រតិភូក្រសួងបរិស្ថាន លោកប្រធាន លោកអនុប្រធានមន្ទីរបរិស្ថានខេត្ត និងមន្ត្រីរាជការក្រោមឱវាទមន្ទីរបរិស្ថានខេត្តស្វាយរៀង ។

នៅក្នុងកិច្ចប្រជុំនោះដែរក៏មានចំណុចមួយចំនួនសម្រាប់អោយមន្ទីរបរិស្ថានខេត្ត អាចចូលរួមអនុវត្តកិច្ចការនេះទទួលបានជោគជ័យ ៖

-ធ្វើបច្ចុប្បន្នភាព និងរៀបផែនការសកម្មភាពចុះត្រួតពិនិត្យគុណភាពបរិស្ថាន និងពង្រឹងការអនុវត្តច្បាប់ តាមបណ្ដារោងចក្រ សហគ្រាស  ក្រុមហ៊ុនដឹកជញ្ជូនដីនិងជីកអាចម៍ដី ភោជនីយដ្ឋាន សណ្ឋាគារ អាហារដ្ឋាន...

-ធ្វើរបាយការណ៍អោយច្បាស់លាស់ពីការចុះអធិការកិច្ច ការចេញលិខិតបញ្ជាកែប្រែ និងការផាកពិន័យ តាមរោងចក្រ សហគ្រាសនានាដែលបានអនុវត្តខុសច្បាប់និងលិខិតបទដ្ឋានគតិយុត្តិពាក់ព័ន្ធបរិស្ថាន

-ចុះផ្សព្វផ្សាយ អប់រំ អំពីចំណេះដឹងទាក់ទង់នឹងការគាំពារបរិស្ថានតាមទីផ្សារ ទីប្រជុំជន និងសហគមន៍ ជាពិសេសសំដៅការអនុវត្ត អនុក្រឹត្យលេខ ១១៣

-ចុះពិនិត្យទីតាំងចាក់សម្រាម់ឯកជននានារបស់ក្រុមហ៊ុនប្រមូលសម្រាម់ ធានាអោយបានត្រឹមត្រូវតាមបច្ចេកទេស

-ធ្វើបច្ចុប្បន្នភាពតំបន់ដែលត្រូវអភិរក្ស (បឹង ព្រែក ព្រៃឈើ ជម្រកសត្វស្លាប .....) នៅក្នងខេត្ត ងាយស្រួលគ្រប់គ្រង់ ការពារ ព្រមទាំងអាចសុំការគាំទ្រពីថ្នាក់ជាតិ

-សហការជាមួយមន្ទីរពាក់ព័ន្ធដើម្បីជំរុញអោយក្រុមហ៊ុនដឹកជញ្ជូនអាចម៍ និងជីកយកអាចម៍ដី គោរពកិច្ចសន្យាបរិស្ថាន ធានាកុំអោយប៉ះពាលដល់ប្រជាជននិងបរិស្ថានជុំវិញ

-ពិនិត្យពិភាក្សាធ្វើផែនការសម្រាប់អនុវត្តស្មារតីអនុក្រឹត្យលេខ ២៣៥ ស្ដីពីការគ្រប់គ្រង់សណល់ទឹកកង្វក់

-សំណូមពរក្រសួងបរិស្ថានអោយមានការបណ្តុះបណ្តាលធនធានមនុស្សបន្ថែមទៀតលើការងារគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវៈចម្រុះនិងការអភិវឌ្ឍដោយចីរភាព ការវាយតម្លៃហេតុប៉ះពាល់បរិស្ថាន និងការវាយតម្លៃមេត្រីភាពបរិស្ថាន ៕ ដោយ៖ភក្ដី