លោកជំទាវ ម៉ែន សំអន សម្ពោធអគារ មណ្ឌលសុខភាពគគីរ ក្នុងការិយាល័យសុខាភិបាល ស្រុកប្រតិបត្តិរមាសហែក ខេត្តស្វាយរៀង

(ស្វាយរៀង)៖ លោកស្រីកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តីរដ្ឋមន្រ្តីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានសម្តែងការសាទរក្នុងពិធីសម្ភោធអាគារមណ្ឌលសុខភាពគគី នៅព្រឹកថ្ងៃទី២៧ ខែមករា ឆ្នាំ២០១៩ ស្ថិតនៅឃុំគគីរ ស្រុករមាសហែក ខេត្តស្វាយរៀង ដែលមានមន្ត្រីរាជការប្រជាពលរដ្ឋចូលរួមប្រមាណជាង១០០០នាក់ ។

លោកស្រី ម៉ែន សំអន បានថ្លែងនូវការផ្តាំផ្ញើរសាកសួរសុខទុក្ខពីសំណាក់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និងសូមសម្តែងនូវការកោតសរសើរដោយស្មោះ ប្រគេនថ្វាយចំពោះ ព្រះថេរានុថេរៈគ្រប់ព្រះអង្គ និងជូនចំពោះអស់លោក លោកស្រី លោកតា លោកយាយ អាជ្ញាធរដែនដីគ្រប់លំដាប់ថ្នាក់ និងបងប្អូនប្រជាពលរដ្ឋទាំងអស់ ដែលតែងតែបានចូលរួមចំណែកអស់ពីកម្លាំងកាយចិត្ត ក្នុងកិច្ចអភិវឌ្ឍនៅមូលដ្ឋានក្នុងពេលកន្លងមក រហូតធ្វើឲ្យមូលដ្ឋានភូមិ-ឃុំនេះសម្រេចបាននូវសមិទ្ធផលថ្មីៗជាច្រើន ។

ជាក់ស្តែង អគារមណ្ឌលសុខភាពគគីរ ថ្មីស្រឡាង ដែលជាអំណោយដ៍ថ្លៃថ្លារបស់សម្តេចអគ្គមហាសេនាបតីតេជោហ៊ុនសែន និងសម្តេចកិត្តិព្រឹទ្ធបណ្ឌិតប៊ុនរ៉ានីហ៊ុនសែន ដែលបានរួមចំណែកយ៉ាងសំខាន់ក្នុងការផ្តល់ សេវាថែរទាំ និងព្យាបាលដល់ប្រជាពលរដ្ឋឥតគិតថ្លៃជាពិសេស ស្រ្តីនិងកុមារ និងមិនត្រឹមតែផ្តល់ការថែទាំនិងព្យាបាលនៅក្នុងឃុំគគីរប៉ុណ្ណោះទេ ប៉ុន្តែថែមទាំងអាចផ្តល់សេវាព្យាបាលជូនដល់បងប្អូន នៅតាមបណ្តាឃុំនានាជុំវិញស្រុករមាសហែកផងដែរ ពោលគឺនឹងរួមចំណែកជំរុញការផ្តល់សេវាថែរទាំសុខភាព នៅក្នុងខេត្តស្វាយរៀង កាន់តែប្រសើរឡើង ។លោកស្រីបានបន្តថា៖ អគារមណ្ឌលសុខភាព ដែលបាននឹងកំពុងរួមគ្នាប្រារព្ធពិធីសម្ពោធដាក់ឲ្យប្រើប្រាស់នាពេលនេះ ជាគំនិតផ្តួចផ្តើមរបស់ សម្តេចតេជោនាយករដ្ឋមន្រ្តី បើទោះបីជាចំនួនប្រជាពលរដ្ឋនៅឃុំគគីរ នៅពុំទាន់សមាមាត្រសមស្របនឹងបង្កើតមណ្ឌលសុខភាពយ៉ាងក្តី។ ដោយមានការគិតគូរអំពីសុខទុក្ខ ពិសេស បញ្ហាសុខភាពរបស់បងប្អូនដែលរងគ្រោះដោយសារគ្រាប់បែកគីមី ដែលអាមេរិកបានទម្លាក់នៅចន្លោះឆ្នាំ ១៩៧០-១៩៧៥ ទើបសម្តេចតេជោ និងសម្តេចកិត្តិព្រឹទ្ធបណ្ឌិត បានសម្រេចផ្តល់ជូនអគារមណ្ឌលសុខភាពគគីរដ៍ថ្មីស្រឡាងនេះឡើង ដើម្បីឆ្លើយតបទៅនឹងតម្រូវការជាក់ស្តែង បន្ទាប់ពីក្រសួងសុខាភិបាល បានរកឃើញថា មានបងប្អូនប្រជាពលរដ្ឋ ដែលរងផលប៉ះពាល់ដោយសារធាតុគីមី ឈ្មោះ អឺជែន អូរ៉េន (Agent Orange) ជា សារធាតុ ហឺបីសាយ (Herbicide) ដ៏សាហាវដែលបានប្រើប្រាស់នៅក្នុងសង្គ្រាម ដែលសហរដ្ឋអាមេរិក ទម្លាក់ ដើម្បីកំទេចគំរបព្រៃឈើ និងកងទ័ពវៀតណាមខាងជើង និងទ័ពវៀតកុង នៅចន្លោះឆ្នាំ ១៩៦១-១៩៧១ ។

លោកស្រី បានក៏បន្ថែមថា៖ សារធាតុគីមីនេះ បានបណ្តាលឲ្យកើតចេញជារោគសញ្ញា មិនប្រក្រតីមួយចំនួនដូចជាៈ ក្បាលធំ ស្វិតដៃ ស្វិតជើង ថប់ដង្ហើម ប្រតិកម្ម-ស្បែក និងរមាស់ជាដើម។

ទន្ទឹមនឹងនេះ សម្តេចតេជោ ក៏បានណែរនាំទៅក្រសួងសុខាភិបាល ដាក់បងប្អូនប្រជាពលរដ្ឋក្នុងឃុំគគីរ ស្រុករមាសហែក ខេត្តស្វាយរៀង ដែលរងគ្រោះដោយសារសារធាតុគីមីអាមេរិក ទៅក្នុងកម្មវិធីសមធម៌ ពោលគឺទទួលបានការពិនិត្យ និងព្យាបាលនៅមន្ទីរពេទ្យរដ្ឋដោយមិនគិតថ្លៃ ។

ក្នុងរយៈពេល៤០ឆ្នំាកន្លងមកនេះ យើងបានរួមគ្នាជាកម្លំាងកសាងនិងអភិវឌ្ឍន៏ប្រទេសឡើងវិញ លើគ្រប់វិស័យ ក្នុងនោះក៏មានវិស័យសុខាភិបាល ក៏ជាវិស័យអទិភាពមួយយ៉ាងសំខាន់ ដែលរាជរដ្ឋាភិបាលបានយកចិត្តទុកដាក់ និងត្រូវបានអភិវឌ្ឍន៏យ៉ាងឆាប់រហ័សគួរឲ្យកត់សំគាល់ ទំាងការស្តារ ការពង្រីកហេដ្ឋារចនាសម្ព័ន្ធមូលដ្ឋានសុខាភិបាល ការអភិវឌ្ឍនិងការពង្រីកសមត្ថភាពស្ថាប័ន ការបង្កើនសមត្ថភាពធនធានមនុស្ស ឱ្យបានឆ្លើយតបទៅនឹងតម្រូវការផ្នែកសុខភាព ជាសារវ័ន្តរបស់ប្រជាពលរដ្ឋទូទាំងប្រទេសផងដែរ ៕ ដោយ៖ភក្ដី