ប្រឡងចូលរៀនពុទ្ធិកមធ្យមសិក្សាបឋមភូមិខេត្តស្វាយរៀង ឆ្នាំសិក្សា២០១៩.២០២០ ចំនួន១២៩អង្គ/នាក់

(ស្វាយរៀង)៖ ព្រឹកថ្ងៃ ០១កើត ខែ ផល្គុន ឆ្នាំ ច សំរឹទ្ធស័ក ព.ស២៥៦២ត្រូវនឹងថ្ងៃទី០៦ ខែ មីនា ឆ្នាំ ២០១៩។ ព្រះវិសុទ្ធិញ្ញាណ មុំ សយ ព្រះរាជាគណថ្នាក់កិត្តិយនិងជា ព្រះមេគណខេត្តស្វាយរៀង លោក សុខ រស់ អភិបាលរងខេត្ត នឹងលោក ទីវ សុភា ប្រធានមន្ទីរធម្មការនិងសាសនាខេត្ត បាននិមន្តនិងអញ្ជើញជាអធិបតី នៅក្នុងពិធីកាត់វិញ្ញាសាប្រឡងចូលរៀនពុទ្ធិកអនុវិទ្យាល័យស្វាយរៀង នៅវត្តជម្ពូព្រឹក្សា ស្ថិតក្នុងភូមិថ្មី សង្កាត់សង្ឃ័រ ក្រុងស្វាយរៀង ។

ព្រះវិសុទ្ធិញ្ញ មុំ សយ បានមានសង្ឃដីកាឱ្យដឹងថា៖ ពុទ្ធិកអនុវិទ្យាល័យស្វាយរៀងនេះ មានអាយុកាល២០វស្សាហើយ ដែលជាអំណោយរបស់លោកនាយឧត្តមសេនីយិ៍ ហុក ឡងឌី អតីតអគ្គស្នងការនគរបាលជាតិ និងលោកស្រី បានកសាងឡើងដើម្បីទុកជាគុណប្រយោជន៍ជាថ្នាលបណ្តុះនូវចំណេះដឹងបំរើឱ្យវិស័យព្រះសាសនា ដែលជាសាសនារបស់រដ្ឋតទៅថ្ងៃខាងមុខទៅតាមពុទ្ធានុញាត៥០០០វស្សាផង និងទុកជាកេរ្តិ៍ដំណែលដល់កូនចៅជាព្រះសង្ឃរៀនសូត្របន្តវេនផងដែរ ។

លោក ទីវ សុភា ប្រធានមន្ទីរធម្មការនិងសាសនាខេត្ត បានឱ្យដឹងថា៖ នៅក្នុងឆ្នាំសិក្សា ២០១៩ .២០២០នេះមានបេក្ខជនសមណៈបេក្ខជនបានដាក់ពាក្យសុំសិទ្ធប្រឡងមានចំនួន១២៩អង្គ/នាក់ ចែកចេញជា៥បន្ទប់ ។

 ក្នុង២០១៩នេះខេត្តស្វាយរៀង មានវត្តសរុបចំនួន២៤៤វត្ត ក្នុងនោះវត្តគណៈធម្ម យុត្តិនិកាយ១វត្តផងដែរមានព្រះសង្ឃចំនួន២.១៣៦អង្គ ក្នុងនោះព្រះសង្ឃគណៈធម្មយុត្តិនិកាយចំនួន២អង្គ ភិក្ខុចំនួន៨៤៣អង្គ និងសាមណេរចំនួន១.២៩៣អង្គ ។

ដោយឡែកការប្រឡងពុទ្ធិកសិក្សានានាក្នុងឆ្នាំសិក្សា២០១៨.២០១៩កន្លងទៅមាន៖

១. ការប្រឡងធម្មវិន័យថ្នាក់ត្រី ថ្នាក់ទោ និងថ្នាក់ឯកមាន បេក្ខសមណៈបានដាក់ពាក្យប្រឡងចំនួនចំនួន៧៣០អង្គ/នាក់បានប្រឡងជាប់៦២៤អង្គ/នាក់ស្មើនឹង៨៥.៤៨ភាគរយ ។

២. ការប្រឡងយកវិញ្ញាបនបត្រពុទ្ធិកបឋមសិក្សាមានបេក្ខសមណៈបានដាក់ពាក្យប្រឡងចំនួន២២៦អង្គបានប្រឡងជាប់១៧៦អង្គស្មើនឹង៧៧.៨៨ភាគរយ ។

៣. ការប្រឡងយកសញ្ញាបត្រពុទ្ធិកមធ្យមសិក្សាបឋមភូមិនៅរាជធានីភ្នំពេញមានបេក្ខសមណៈបានដាក់ពាក្យប្រឡងចំនួន ១៥អង្គនិងបានប្រឡងជាប់៨អង្គស្មើនឹង៥៣.៣៣ភាគរយផងដែរ ។

លោកបានបញ្ចាក់ថា៖ ចំពោះការងារពុទ្ធិកសិក្សានិងបណ្ណាល័យក្នុងឆ្នាំសិក្សា២០១៩.២០២០នេះ នៅទូទាំងខេត្តមានសាលាធម្មវិន័យចំនួន៤០កន្លែង សាលាពុទ្ធិកបឋមមានចំនួន៨កន្លែង ស្មើនិង៥២បន្ទប់ និងពុទ្ធិកមធ្យមសិក្សាមាន១កន្លែង សរុបសមណសិស្សសរុបមានចំនួន១.៥៣៧អង្គ/នាក់ ៕ ដោយ៖ភក្ដី