ដាក់សម្ភោធអោយប្រើប្រាស់ជាផ្លូវការអាគាររដ្ឋបាលថ្មីការិយាល័យគយ និងរដ្ឋាករក្រុងបាវិត

(ស្វាយរៀង)៖ក្រោមអធិបភាពលោក អគ្គបណ្ឌិតសភាចារ្យ អូន ព័ន្ធមុន្នីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក ម៉ែន វិបុល អភិបាលខេត្តស្វាយរៀង បានអញ្ជើញជាអធិបតីក្នុងពិធីបើកសម្ភោធជាផ្លូវការអាគាររដ្ឋបាលថ្មី ការិយាល័យគយ និងរដ្ឋាករក្រុងបាវិត និងជួបសំណេះសំណាលជាមួយមន្ត្រីរាជការ នៃអង្គភាពក្រោមឱវាទក្រសួងសេដ្ឋកិច្ចនឹងហិរញ្ញវត្ថុ ខេត្តស្វាយរៀង និងខេត្តព្រៃវែង នៅថ្ងៃទី០៧ ខែមីនា ឆ្នាំ២០១៩ ។

 លោកអគ្គបណ្ឌិត​សភាចា​រ្យ​ អូន​ ព័ន្ធ​មុនី​រ័​ត្ន បាន​ណែនាំ​ឲ្យ​មន្ត្រី​គយ​ប្រចាំ​ច្រក​ទ្វា​អន្តរជាតិ​បាវិត ត្រូវ​ប្រឹងប្រែង​ប្រមូល​ចំណូល​ពន្ធ​ជូន​រដ្ឋ​ ឲ្យ​មានការ​កើនឡើង ព្រោះ​​ពី​មួយ​ឆ្នាំទៅ​មួយ​ឆ្នាំ​ ការ​ចំណាយ​របស់​រដ្ឋាភិបាល​មានការ​កើន​ឡើងជា​លំដាប់​ ដូច្នោះ​មន្ត្រី​គយ​ដែល​មាន​ភារកិច្ច​ប្រមូល​ចំណូល​ពន្ធ​ជូន​រដ្ឋ​ ត្រូវធ្វើ​យ៉ាងណា​រក​ចំណូល​ចូល​ថវិកាជាតិ​ ឲ្យ​បាន​កាន់តែ​ច្រើន​ឡើង​ តាម​រយៈ​ការ​ប្រមូល​ពន្ធ​លើ​ទំនិញ​នាំ​ចេញ​ នាំ​ចូល​តាម​ច្រក​ទ្វា​អន្តរជាតិ​នេះ​ប្រកបដោយ តម្លាភាព​ គ​ណេ​យ្យ​ភាព និង​ការ​ប្រមូល​ពន្ធ​ប្រកប​ទៅ​ដោយ​ស្តង់ដា​វិជ្ជាជីវៈ​ត្រឹមត្រូវ​ ជា​ពិសេស​ត្រូវ​ ធ្វើការ​ទប់ស្កាត់​រាល់​ទំនិញគេចពន្ធ​ ដែល​ពួក​ឈ្មួញ​ខិលខូច​លួច​នាំ​ទំនិញ​ចេញចូល​តាម​ច្រករបៀង​នានា​ឲ្យ​បានជា​ដាច់ខាតផងដែរ ។​

លោកអគ្គ​បណ្ឌិត​សភាចា​រ្យ​បានបញ្ជាក់ថា៖ មន្ត្រី​គយ​ ដែល​ប្រចាំការ​នៅ​ច្រក​ទ្វារ​ព្រំដែន ត្រូវ​ចេះ​សហការ​ជាមួយ​សមត្ថកិច្ច​អាជ្ញាធ​មូលដ្ឋាន ជាពិសេសត្រូវចេះសហការជាមួយប្រទេសដែលនៅជិតគ្នា ដើម្បីងាយស្រួលក្នុងការបំពេញការងារអ្វីមួយ ។

ចុងបញ្ចប់នៃពិធីលោកអគ្គបណ្ឌិតសភាចារ្យ អូន ព័ន្ធមុន្នីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានអញ្ជើញចុះពិនិត្យច្រកទ្វារទ្វេរភាគីសំរោង   ដែលស្ថិតនៅស្រុកចន្ទ្រា ខេត្ដស្វាយរៀង ៕ ដោយ៖ភក្ដី