សសយកខេត្តស្វាយរៀង ប្រជុំត្រួតពិនិត្យវឌ្ឍនភាពការងារ លើកទិសដៅបន្តនិងបណ្តុះបណ្តាលក្រមសីលធម៌ បញ្ជានិងនីតិវិធី សម្រាប់ការបោះឆ្នោតជ្រើសរើសក្រុមប្រឹក្សាខេត្ត រាជធានី ក្រុមប្រឹក្សាក្រុង ស្រុក ខណ្ឌ អាណត្តិទី៣ ឆ្នាំ២០១៩

(ស្វាយរៀង)៖ នៅថ្ងៃទី៤ ខែឧសភា ឆ្នាំ២០១៩ សហភាពសហព័ន្ធយុវជនកម្ពុជា ខេត្តស្វាយរៀងបើកកិច្ចប្រជុំត្រួតពិនិត្យវឌ្ឍនភាពការងារ លើកទិសដៅបន្ត និងបណ្តុះបណ្តាលក្រមសីលធម៌ បញ្ជានិងនីតិវិធី សម្រាប់ការបោះឆ្នោតជ្រើសរើសក្រុមប្រឹក្សាខេត្ត រាជធានី ក្រុមប្រឹក្សាក្រុង ស្រុក ខណ្ឌ អាណត្តិទី៣ ឆ្នាំ២០១៩ ដល់អ្នកសង្កេតការណ៍ជាតិ សសយក ខេត្ត ដោយមានការដឹកនាំពីលោក តូច ប៉ូលីវ៉ា  អនុប្រធានសសយកខេត្តស្វាយរៀងនិងជាប្រធានក្រុមអ្នកសង្កេតការណ៍ លោក ទុំ សារ៉ាវុធ អនុប្រធានប្រចាំការសសយកខេត្តស្វាយរៀង  តំណាងលោក ឌី វិជ្ជា ប្រធានសសយក ខេត្ត ។

ក្នុងកិច្ចប្រជុំត្រួតពិនិត្យវឌ្ឍនភាព និងទិសដៅការងារសម្រាប់អ្នកសង្កេតការណ៍ ក្នុងកំឡុងពេលបោះឆ្នោតជ្រើសរើសក្រុមប្រឹក្សាខេត្ត ស្រុក ក្រុង ខណ្ឌ អាណត្តិទី៣ ឆ្នាំ២០១៩ លើចំនុចសំខាន់ៗដូចជា៖

-ពង្រឹងក្រុមការងារដឹកនាំអ្នកសង្កេតការណ៍របស់ សសយក ខេត្តស្វាយរៀង

-បទបង្ហាញអំពីក្រមសីលធម៌អ្នកសង្កេតការណ៍ និងរបៀបរបបរាយការណ៍ពីស្ថានភាពនៃមណ្ឌលបោះឆ្នោតនីមួយៗ

-ធ្វើបទបង្ហាញពាក់ព័ន្ធទៅលើដំណើរការបោះឆ្នោតដូចជា ៖

•អំពីអង្គបោះឆ្នោត និងចំនួនការិយាល័យបោះឆ្នោត

•អំពីប្រភេទនៃសន្លឹកឆ្នោតសម្រាប់ការបោះឆ្នោតក្រុមប្រឹក្សាខេត្ត និងក្រុមប្រឹក្សាស្រុកក្រុង

•លេខរៀងគណបក្សនយបាយលើសន្លឹកឆ្នោតទៅតាមមណ្ឌលនីមួយៗ

•យុទ្ធនាការឃោសនាបោះឆ្នោត

•ការប្រើប្រាស់ទម្រង់សម្រាប់ប្តឹង និងរបៀបនៃការធ្វើបណ្តឹងជំទាស់ ឬតវ៉ា ។

សូមបញ្ជាក់ថា : សសយក ខេត្តស្វាយរៀង បានទទួលការអនុញ្ញាតិចូលរួមសង្កេតការណ៍ពីគជប តាមរយៈសេចក្តីសម្រេចលេខ០០៩ គជប.សសរ ចំនួន២៨នាក់(ស្រី៥នាក់) សម្រាប់៩មណ្ឌលទូទាំងខេត្ត ៕ ដោយ៖ភក្ដី