វេទិការពិគ្រោះយោបល់ជាមួយសមាគ អង្គការ មិនមែនរដ្ឋាភិបាល និងសហគមន៍ក្នុងខេត្តស្វាយរៀង ក្រោមប្រធានបទ “កិច្ចសហប្រតិបត្តិការក្នុងភាពជាដៃគូ រវាងរដ្ឋបាលខេត្ត និងអង្គការសង្គមស៊ីវិល”

(ស្វាយរៀង): នៅថ្ងៃទី០៩ ខែឧសភា ឆ្នាំ២០១៩ ឯកឧត្តម ម៉ែន វិបុល អភិបាលខេត្តស្វាយរៀង បានអញ្ជើញជាអធិបតីក្នុងកិច្ចប្រជុំវេទិការពិគ្រោះយោបល់ជាមួយសមាគម អង្គការ មិនមែនរដ្ឋាភិបាល និងសហគមន៍ក្នុងខេត្តស្វាយរៀងក្រោម ប្រធានបទ “កិច្ចសហប្រតិបត្តិការក្នុងភាពជាដៃគូ រវាងរដ្ឋបាលខេត្តនិងអង្គការសង្គមស៊ីវិល នឹងចូលរួមក្នុងវេទិការនេះមាន ឯកឧត្តមអភិបាលរងខេត្ត លោកប្រធានមន្ទីរ-អង្គភាពពាក់ព័ន្ធជុំវិញខេត្ត តំណាងកងកម្លាំង លោកអភិបាលក្រុង -ស្រុកទាំង៨ និងអង្គការ-សមាគម នានាជាច្រើនរូបទៀត ។

ឯកឧត្តមអភិបាលខេត្តបានឱ្យដឹងថា សមាគម និងអង្គការជាតិ និងអង្គការអន្តរជាតិបានដើតួនាទីយ៉ាងសំខាន់ក្នុងការផ្តល់ និងគាំទ្រដល់សេវាសង្គមទាំងនៅតាមមូលដ្ឋានជនបទ និងសហគមន៍ដាច់ស្រយ៉ាល និងធ្វើសកម្មភាពនៅក្រុង ស្រុក ឃុំ សង្កាត់ក្នុងវិស័យសំខាន់ៗ ដែលពាក់ព័ន្ធនិងសេដ្ឋកិច្ចសង្គម នៅក្នុងខេត្ត ក៏ដូចជាការលើកកម្ពស់ជីវភាពបងប្អូនប្រជាពលរដ្ឋយ៉ាងផុលផុស រួមចំណែកកាត់បន្ថយភាពក្រីជាមួយរាជរដ្ឋាភិបាលកម្ពុជា ។

សមាគម និងអង្គការមិនមែនរដ្ឋាភិបាលក៏បានចូលរួមផងដែរ ក្នុងការតស៊ូមតិឱ្យមានកំណែទំរង់ជាតិ ដើម្បីលើកម្ពស់សុខភាព ការអប់រំ អភិបាលកិច្ច សិទ្ធមនុស្ស ប្រព័ន្ធយុត្តិធម៌ ច្បាប់ សេវាសង្គម បរិស្ថាន សុខមាលភាពស្រ្តី និងកុមារ ។

ឯកឧត្តមបន្តថា ដើម្បីរួមចំណែកពង្រឹងកិច្ចសហប្រតិបត្តិការ និងភាពជាដៃគូល្អប្រសើររវាងរដ្ឋបាលថ្នាក់ក្រោមជាតិ ជាមួយសមាគម អង្គការមិនមែនរដ្ឋាភិបាល និងសហគមន៍នានានៅក្នុងខេត្តស្វាយរៀងត្រូវ៖

១. អង្គភាពពាក់ព័ន្ធត្រូវសម្របសម្រួល និងបង្កលក្ខណៈងាយស្រួលដល់អង្គការ-សមាគម នាដែលបានចុះបញ្ជីត្រឹមត្រូវនៅក្រសួងមហាផ្ទៃ និងបន្តផ្សព្វផ្សាយដល់ប្រជាពលរដ្ឋឲ្យមានការប្រុង ប្រយ័ត្នខ្ពស់ កុំឲ្យចាញ់បោកភ្នាក់ងារប្រតិបត្តិការលើវិស័យធនាគារ និងមីក្រូហិរញ្ញវត្ថុ ដែលគ្មានច្បាប់អនុញ្ញាត ឬអាជ្ញាបណ្ណ។

២.រដ្ឋបាលក្រុងស្រុកត្រូវរៀបចំវេទិកាពិគ្រោះយោបល់ជាមួយសមាគម អង្គការមិនមែនរដ្ឋាភិបាល និងសហគមន៍នានា ដែលធ្វើសកម្មភាពក្នុងដែនសមត្ថកិច្ចរបស់ខ្លួនឲ្យបានទៀតទាត់រៀងរាល់មួយឆមាសម្ដង ឬតាមការចាំបាច់។

៣.ស្នើដល់សមាគម និងអង្គការមិនមែនរដ្ឋាភិបាល និងដៃគូអភិវឌ្ឍន៍នានា បន្តផ្តល់ការគាំទ្រ និងចូលរួមជាមួយរដ្ឋបាលខេត្តក្នុងការលើកកម្ពស់លិទ្ធិប្រជាធិបតេយ្យ និងការអភិវឌ្ឍសេដ្ឋកិច្ចសង្គម ជាពិសេសសូមបន្តចូលរួម និងគាំទ្រគម្រោងផែនការអភិវឌ្ឍន៍៥ឆ្នាំ និងគម្រោងវិនិយោគ៣ឆ្នាំរំកិល របស់រដ្ឋបាលខេត្តក្រុង ស្រុក និងឃុំ សង្កាត់។

៤.សមាគម និងអង្គការមិនមែនរដ្ឋាភិបាលទាំងអស់ ត្រូវធ្វើសកម្មភាពឲ្យស្របតាមច្បាប់ស្តីពីសមាគម និងអង្គការមិនមែនរដ្ឋាភិបាលច្បាប់ លិខិតបទដ្ឋានគតិយុត្តនានាជាធរមាន ។

៥.សមាគម អង្គការមិនមែនរដ្ឋាភិបាលដែលកំពុងធ្វើសកម្មភាពក្នុងខេត្ត សូមផ្តល់ជារបាយការណ៍ក្រោយបញ្ចប់សកម្មភាព ឬរបាយការណ៍ប្រចាំខែ ប្រចាំត្រីមាស និងប្រចាំឆ្នាំមករដ្ឋបាលខេត្ត ៕ ដោយ:ភក្ដី