សាខាកាកបាទក្រហមកម្ពុជាខេត្តស្វាយរៀង សូមចូលរួមសោកស្តាយ និងរំលែកទុកចំពោះគ្រួសារសព យាយ និងចៅ ដែលបានស្លាប់ក្នុងករណីផ្ទុះគ្រាប់បែក នៅស្រុកស្វាយទាបកាលពីព្រឹកមិញ

(ស្វាយរៀង): នៅថ្ងៃទី១០ ខែមិថុនា ឆ្នាំ២០១៩ បន្ទាប់ពីទទួលបានព័ត៌មានដ៏សែនរន្ធត់ និងក្រៀមក្រំនេះមក លោកស្រី ដួង វណ្ណា អនុប្រធានកិត្តិយសសាខាកាកបាទក្រហមកម្ពុជាខេត្តស្វាយរៀង រួមដំណើរដោយលោកស្រី ពៅ សុភាព ហេរញ្ញឹកគណៈកម្មាធិការសាខានាំយកបច្ច័យ ទេយ្យទានទៅចូលរួមរំលែកទុក្ខ ដល់ក្រុមគ្រួសារសព ។

លោកស្រី ដួង វណ្ណា បានចូលរួមសម្តែងនូវក្តីរន្ធត់ក្រៀមក្រំឥតឧបមា លោកជំទាវបានដឹកនាំ ក្រុមការងារសាខាយកថវិកា និងសម្ភារៈមួយចំនួន ជូនដល់គ្រួសារនៃសព លោកជំទាវតំណាង គណៈកម្មាធិការសាខា សូមចូលរួមរំលែកទុក្ខដល់ក្រុមគ្រួសារនៃសព ហើយថវិកាដ៏តិចតួចស្តួចស្តើងទាំងនេះមិនអាចជួយទុក្ខលំបាកដល់បងប្អូនទាំងស្រុងនោះទេ គ្រាន់តែអាចជួយសម្រួលបានមួយគ្រាតែប៉ុណ្ណោះ និងសូមបួងសួង សូមវិញ្ញាណក្ខ័ន្ធអ្នកដែលបានស្លាប់ទៅកាន់សុគតិភពកុំបីឃ្លៀងឃ្លាតឡើយ ។

លោកស្រីក៏បានប្រគល់ជូនដល់គ្រួសារសពនូវអង្ករ ១០០ គ.ក្រ ទៀន ២ គ.ក្រ ធូប ២ ដុំ ទេយ្យទាន ២ កញ្ចប់ ទឹកបរិសុទ្ធ ២ កេស ទឹកក្រូច ២ កេស និងថវិកាចូលបុណ្យ ៥០០,០០០ រៀល លោកជំទាវឧបនាយករដ្ឋមន្ត្រី ម៉ែន សំអន ឧបត្ថម្ភថវិកាចូលបុណ្យតាមរយៈសាខាកាកបាទក្រហមកម្ពុជាខេត្ត ចំនួន ៥០០,០០០ រៀល ។

សូមបញ្ជាក់ផងដែរថា: កាលវេលាម៉ោង ៩:៣៥ នាទីព្រឹកមិញនេះ មានករណីផ្ទុះគ្រាប់បែកក្រសាំងដែលទុក​ចោល​ក្រោមជង្រុកស្រូវអស់រយៈពេលច្រើនឆ្នាំ ហើយបានរើស​​មកដំបំបែកដើម្បីទុកលក់អេដចាយ ក៍បណ្តាលឲ្យផ្ទុះស្លាប់មនុស្ស២នាក់​

-១ ឈ្មោះ ផង់ សុភី ភេទស្រី អាយុ៦៥ឆ្នាំ

-២ ឈ្មោះ ឃួន បញ្ញា ភេទប្រុស អាយុ១០ឆ្នាំ

អ្នកទាំងពីរមានទីលំនៅភូមិ សំបួរ ឃុំសំបួរ ស្រុកស្វាយទាប ខេត្តស្វាយរៀង ៕ ដោយ:ភក្តី