កិច្ចប្រជុំត្រួតពិនិត្យការងាលុបបំបាត់ឱសថក្លែងក្លាយ និងសេវាសុខាភិបាលខុសច្បាប់ ដើម្បីកាត់បន្ថយភាពក្រីក្រ

(ស្វាយរៀង): នៅថ្ងៃចន្ទ ១កើត ខែជេស្ឋ ឆ្នាំកុរ ឯកស័ក២៥៦៣ ត្រូវនឹង ថ្ងៃទី ៣ ខែមិថុនា ឆ្នាំ២០១៩ លោក តូច ប៉ូលីវ៉ា អភិបាលរងខេត្ត និងជាប្រធានគណៈកម្មាធិការប្រយុទ្ធប្រឆាំងឱសថក្លែងក្លាយ និងសេវាសុខាភិបាលខុសច្បាប់ ខេត្ត តំណាងលោក ម៉ែន វិបុល អភិបាលខេត្ត បានអញ្ជើញចូលរួមជាអធិបតីក្នុងកិច្ចប្រជុំត្រួតពិនិត្យការងាប្រចាំឆមាសទី១ និងដាក់ទិសដៅបន្ត លើការងារលុបបំបាត់ឱសថក្លែងក្លាយ និងសេវាសុខាភិបាលខុសច្បាប់ ដើម្បីកាត់បន្ថយភាពក្រីក្រ និងមានការចូលរួមពីលោកស្រីព្រះរាជអាជ្ញារងអបសាលាដំបូងខេត្ត លោកប្រធានមន្ទីរសុខាភិបាលខេត្ត លោកអនុប្រធានមន្ទីរសុខាភិបាល តំណាងស្នងការដ្ឋាននគរបាលខេត្ត លោកប្រធានអនុគណៈកម្មការទាំង៨ ស្រុក ក្រុង តំណាងទីចាត់ការអន្តរវិស័យ លោកប្រធានលេខាធិការដ្ឋានប្រយុទ្ធប្រឆាំងឱសថក្លែងក្លាយ លោក លោកស្រីប្រធានមន្ទីរនានា លោក លោកស្រី ប្រធាន អនុប្រធានការិយាល័យ នៃមន្ទីរសុខាភិបាលខេត្ត ។

កិច្ចប្រជុំផ្តោតទៅលើ ៖

-ករណីអ្នកដើរចាក់ថ្នាំឈ្មោះ ព្រាប សេ នៅឃុំសំឡី ស្រុកកំពង់រោទិ៍ដែលបានចាក់ថ្នាំបណ្តាលអោយប្រជាជនម្នាក់ស្លាប់នាពេលកន្លងមក

-ដាក់វិធានការច្បាប់ និងនីតិវិធីច្បាប់ដើម្បីទប់ស្កាត់ចំពោះអ្នកបន្តរកសុីដើរចាក់ថ្នាំខុសច្បាប់ បញ្ជូនទៅស្ថាប័នតុលាការ

-បិទបង្ហាញឈ្មោះអ្នករកសុីដើរចាក់ថ្នាំខុសច្បាប់នៅមុខសាលាឃុំ សង្កាត់ ដើម្បីអោយប្រជាជនបានដឹងនិងស្គាល់ កុំអោយប្រជាជនទៅរកសេវាខុសច្បាប់បន្តទៀត

-ស្រាវជ្រាវប្រភពថ្នាំពេទ្យដែលក្រុមអ្នករកសុីដើរចាក់ថ្នាំខុសច្បាប់យកមកប្រើ ដើម្បីមានវិធានការទប់ស្កាត់

កន្លែងលក់ឱសថទាំងនោះ

-ពង្រឹងសមត្ថភាព និងការផ្ដល់សេវានៅតាមមណ្ឌលសុខភាព និងមន្ទីរពេទ្យបង្អែក បែងចែកកាលវិភាគវេនយាមរបស់បុគ្គលិកអោយបានច្បាស់លាស់ ដើម្បីផ្តល់សេវាប្រកបដោយគុណភាពក្រមសីលធម៌វិជ្ជាជីវៈ ជូនដល់ប្រជាជន

-ធ្វើផែនការផ្សព្វផ្សាយអប់រំអំពីការលុបបំបាត់ឱសថក្លែងក្លាយ និងសេវាសុខាភិបាលខុសច្បាប់ ដល់អនុគណៈកម្មាការ ក្រុងស្រុកទាំង៨ និងរៀបចំកិច្ចប្រជុំត្រួតពិនិត្យការងាររបស់គណៈកម្មាការក្នុង១ឆ្នាំយ៉ាងតិច៤ដង ដើម្បីដោះស្រាយបញ្ហាប្រឈម និងដាក់ទិសដៅអនុវត្តបន្ត

-ជំរុញអោយបុគ្គលិកសុខាភិបាលរបស់រដ្ឋ និងអ្នកប្រកបរបរវីជ្ជាជីវៈសុខាភិបាលត្រូវចុះបញ្ជីគណៈវិជ្ជាជីវៈសុខាភិបាលអោយបានគ្រប់ៗគ្នា

-សូមអោយអ្នកពាក់ព័ន្ធទាំងអស់ចូលរួមសហការក្នុងការលុបបំបាត់ឱសថក្លែងក្លាយ និងសេវាសុខាភិបាលខុសច្បាប់ ជាពិសេសស្ថាប័នតុលាការ (សាលាដំបូងខេត្ត និងអយ្យការអមសាលាដំបូងខេត្ត) ៕ ដោយ:ភក្តី