(ស្វាយរៀង): នៅព្រឹកថ្ងៃសៅរ៍ ទី៧ ខែកញ្ញា ឆ្នាំ២០២៤ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា បានអញ្ជើញចូលរួមជាអធិបតីក្នុងពិធី ពិភាក្សាសន្ទនាមូលដ្ឋានលើប្រធានបទ ការចូលរួមរបស់អាណាព្យាបាល និងការត្រៀមលក្ខណៈសម្បត្តិតម្រង់ទិសកូនចូលមហាវិទ្យាល័យ ឬការចាប់យកជំនាញវិជ្ជាជីវៈ និងការចូលរួមវេចនំអន្សមរួមគ្នានៅវិទ្យាល័យគោកព្រីង ស្រុកស្វាយជ្រំ។
នៅក្នុងពិធីនេះក៏មានការអញ្ជើញចូលរួមពី ឯកឧត្តម ឌី វិជ្ជា ប្រធានសហភាពសហព័ន្ធយុវជនកម្ពុជាខេត្តស្វាយរៀង ឯកឧត្តម ប៉េង ពោធិ៍សា អភិបាលខេត្តស្វាយរៀង ឯកឧត្តមបណ្ឌិត តូច ប៉ូលីវ៉ា សមាជិកអចិន្ត្រៃយ៍សហភាពសហព័ន្ធយុវជនកម្ពុជាខេត្តស្វាយរៀង លោកគ្រូអ្នកគ្រូ គណៈកម្មាធិការស.ស.យ.ក ស្រុកទាំងប្រាំបីក្រុង ស្រុក យុវជនកាយរិទ្ធ យុវជនកាកបាទក្រហមកម្ពុជា និងបងប្អូនប្រជាពលរដ្ឋជាច្រើនរូបទៀត។
ឯកឧត្តមប្រធាន ហ៊ុន ម៉ានី បានមានប្រសាសន៍នៅក្នុងកម្មវិធីរួមថា ក្នុងនាមជាយុវជនជាទំពាំងស្នងឬស្សីជាកូនខ្មែរជំនាន់ក្រោយ ត្រូវរក្សាឱ្យបាននូវសុខសន្តិភាពស្ថេរភាពសង្គមជាតិ ក៏ដូចជាមានការខិតខំប្រឹងប្រែងតស៊ូព្យាយាមសិក្សារៀនសូត្រដើម្បីអភិវឌ្ឍជាតិរបស់យេីងឱ្យមានការរីកលូតលាស់តទៅមុខដោយឥតឈប់ឈរ។
ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានបន្ថែមថាក្នុងនាមជាយុវជន ក្នុងនាមជាកូនខ្មែរ ត្រូវរួបរួមសាមគ្គីគ្នាជាធ្លុងមួយ ដើម្បីប្រទេសជាតិរបស់យើង កុំឱ្យវិលទៅរកដូចសម័យកាលដេីម ហើយឯកឧត្តម បានបន្ថែមពីលើនេះថាត្រូវធ្វើឱ្យប្រទេសជាតិមានភាពលេចមុខ លេចមាត់នៅលើឆាកអន្តរជាតិ ដេីម្បីជោគវាសនារបស់ប្រទេសយេីង។
ឯកឧត្តម ហ៊ុន ម៉ានី ក៏បានសង្កត់ធ្ងន់ថាខ្មែរច្រើន ខ្មែរមិនខ្លាំងទេ តែខ្មែរតែមួយនោះទើបខ្មែរខ្លាំង ហើយជាចុងក្រោយ ឯកឧត្តម ហ៊ុនម៉ានី ក៏បានថ្លែងអំណរគុណយ៉ាងជ្រាលជ្រៅជូនចំពោះ ឯកឧត្តម ប៉េង ពោធិ៍សា អភិបាលខេត្តឯកឧត្តមលោកជំទាវ ដែលបានអញ្ជើញចូលរួមជាធិបតី ប្អូនៗយុវជន ដែលបានចូលរួមនិងសូមជូនពរដល់អង្គពិធីថ្ងៃនេះ៕
ដោយ:ភក្ដី
No comments:
Post a Comment