ប្រកាសតែងតាំងប្រធានមន្ទីរអភិវឌ្ឍន៍ជនបទខេត្តស្វាយរៀងថ្មី ដើម្បីពង្រឹងសន្ទុះយុទ្ធសាស្ត្របញ្ចកោណ ដំណាក់កាលទី១

ប្រកាសតែងតាំងប្រធានមន្ទីរអភិវឌ្ឍន៍ជនបទខេត្តស្វាយរៀងថ្មី ដើម្បីពង្រឹងសន្ទុះយុទ្ធសាស្ត្របញ្ចកោណ ដំណាក់កាលទី១

ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ឆាយ រិទ្ធីសែន រដ្ឋមន្ត្រីក្រសួងអភិវឌ្ឍន៍ជនបទ នាព្រឹកថ្ងៃទី១៣ ខែកុម្ភៈ ឆ្នាំ២០២៦ នៅសាលប្រជុំ អគារ ឃ សាលាខេត្តស្វាយរៀង បានរៀបចំពិធីប្រកាសចូលកាន់មុខតំណែងប្រធានមន្ទីរអភិវឌ្ឍន៍ជនបទខេត្តស្វាយរៀង ។ ពិធីនេះក៏មានការអញ្ជើញចូលរួមពី ឯកឧត្តម ម៉ែន វិបុល ប្រធានក្រុមប្រឹក្សាខេត្ត ឯកឧត្តម ប៉េង ពោធិ៍សា អភិបាល នៃគណៈអភិបាលខេត្តស្វាយរៀង ព្រមទាំងថ្នាក់ដឹកនាំក្រសួង និងមន្ត្រីរាជការជុំវិញខេត្តយ៉ាងច្រើនកុះករផងដែរ។

ឯកឧត្តម ប៉េង ពោធិ៍សា អភិបាលខេត្តស្វាយរៀង បានសម្តែងនូវការអបអរសាទរចំពោះប្រធានមន្ទីរថ្មី និងបានថ្លែងអំណរគុណដល់ក្រសួងអភិវឌ្ឍន៍ជនបទ ដែលតែងតែផ្តល់កិច្ចសហការយ៉ាងស្អិតរមួតជាមួយរដ្ឋបាលខេត្ត។ ឯកឧត្តមអភិបាលខេត្តបានផ្តល់អនុសាសន៍ថា៖ "ប្រធានមន្ទីរថ្មី ត្រូវបន្តសហការឱ្យបានល្អជាមួយអាជ្ញាធរគ្រប់លំដាប់ថ្នាក់ ដើម្បីពន្លឿនការងារអភិវឌ្ឍន៍ភូមិឋាន ឆ្លើយតបនឹងសេចក្តីត្រូវការរបស់ពលរដ្ឋ ពិសេសលើការថែទាំផ្លូវលំជនបទ និងការផ្គត់ផ្គង់ទឹកស្អាតឱ្យបានគ្រប់ជ្រុងជ្រោយ"។

ក្នុងប្រសាសន៍សំណេះសំណាលនាឱកាសនោះ ឯកឧត្តមរដ្ឋមន្ត្រី ឆាយ រិទ្ធីសែន បានសង្កត់ធ្ងន់ថា ការប្រកាសតែងតាំងមុខតំណែងនាពេលនេះ គឺជាការឆ្លើយតបទៅនឹងតម្រូវការចាំបាច់ក្នុងការបន្តពង្រឹងប្រសិទ្ធភាពការងារ ស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ ក្រោមការដឹកនាំដ៏ឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ឯកឧត្តមរដ្ឋមន្ត្រីបានរំលឹកថា ក្នុងមុំនៃយុទ្ធសាស្ត្របញ្ចកោណ វិស័យអភិវឌ្ឍន៍ជនបទត្រូវដើរតួនាទីជាសសរស្តម្ភក្នុងការជំរុញអាទិភាពគន្លឹះចំនួន ៥ គឺ «មនុស្ស ផ្លូវ ទឹក ភ្លើង និងបច្ចេកវិទ្យា» ដើម្បីប្រែក្លាយតំបន់ជនបទឱ្យទៅជាកន្លែងដែលគួរឱ្យចង់រស់នៅ ប្រកបដោយបរិស្ថានស្អាត និងសេដ្ឋកិច្ចមានស្ថិរភាព។

បន្ទាប់ពីទទួលបានប្រកាសតែងតាំង លោកប្រធានមន្ទីរថ្មី បានឡើងប្តេជ្ញាចិត្តយ៉ាងមុតមាំក្នុងការស្មោះត្រង់ជានិច្ចចំពោះជាតិ និងរាជរដ្ឋាភិបាល ដោយសន្យានឹងខិតខំពង្រឹងសាមគ្គីភាពផ្ទៃក្នុង និងយកចិត្តទុកដាក់អនុវត្តតាមអនុសាសន៍ណែនាំរបស់ថ្នាក់ដឹកនាំឱ្យមានប្រសិទ្ធភាពខ្ពស់បំផុត។

ជាទីបញ្ចប់ ឯកឧត្តមរដ្ឋមន្ត្រី ឆាយ រិទ្ធីសែន បានផ្ដាំផ្ញើដល់ថ្នាក់ដឹកនាំ និងមន្ត្រីមន្ទីរទាំងអស់ ត្រូវបន្តចុះមូលដ្ឋានឱ្យបានជាប្រចាំ ដើម្បីដោះស្រាយបញ្ហាប្រឈមរបស់ប្រជាពលរដ្ឋ និងត្រូវធានាឱ្យបាននូវតម្លាភាព និងគុណភាពសំណង់ហេដ្ឋារចនាសម្ព័ន្ធជនបទ ដើម្បីបម្រើផលប្រយោជន៍ជូនប្រជាពលរដ្ឋក្នុងខេត្តស្វាយរៀងឱ្យកាន់តែប្រសើរឡើងឥតឈប់ឈរ៕