ខេត្តស្វាយរៀង បើកសិក្ខាសាលាជំរុញការកំណត់អត្តសញ្ញាណកម្មពិការភាព តាមគំរូសង្គម និងសិទ្ធិជាមូលដ្ឋាន ដើម្បីលើកកម្ពស់គុណភាពជីវិតជនមានពិការភាព

 ខេត្តស្វាយរៀង បើកសិក្ខាសាលាជំរុញការកំណត់អត្តសញ្ញាណកម្មពិការភាព តាមគំរូសង្គម និងសិទ្ធិជាមូលដ្ឋាន ដើម្បីលើកកម្ពស់គុណភាពជីវិតជនមានពិការភាព

(ខេត្តស្វាយរៀង): នៅព្រឹកថ្ងៃពុធ ទី១១ ខែមីនា ឆ្នាំ២០២៦ នៅសាលប្រជុំធំសាលាខេត្ត ក្រោមអធិបតីភាពឯកឧត្តម សែម សុខា រដ្ឋលេខាធិការក្រសួងសង្គមកិច្ច តំណាងដ៏ខ្ពង់ខ្ពស់ឯកឧត្តមរដ្ឋមន្ត្រី លោក ញ៉ែម សារី អភិបាលរងខេត្ត តំណាងឯកឧត្តមអភិបាលខេត្ត និងឯកឧត្តម ចាប តូ អនុរដ្ឋលេខាធិការក្រសួងសង្គមកិច្ច បានអញ្ជើញជាអធិបតី ក្នុងសិក្ខាសាលាស្តីពី "ការជំរុញការកំណត់អត្តសញ្ញាណកម្មពិការភាព តាមគំរូសង្គម និងសិទ្ធិជាមូលដ្ឋានដល់រដ្ឋបាលឃុំ សង្កាត់ ខេត្តស្វាយរៀង" និងមានការចូលរួមពីប្រធានមន្ទីរអង្គភាពជុំវិញខេត្ត អភិបាលក្រុង/ស្រុក មេឃុំ/ចៅសង្កាត់ និងមន្ត្រីទទួលបន្ទុកកម្មវិធីសរុបប្រមាណជាង២០០នាក់។

ក្នុងរបាយការណ៍ស្វាគមន៍របស់ លោក ញ៉ែម សារី អភិបាលរងខេត្ត បានគូសបញ្ជាក់ថា រដ្ឋបាលខេត្តស្វាយរៀង តែងតែយកចិត្តទុកដាក់ខ្ពស់លើវិស័យពិការភាព ដោយចាត់ទុកថាជនមានពិការភាពគឺជាកម្លាំងចលករមួយនៃធនធានមនុស្សក្នុងការអភិវឌ្ឍជាតិ។ តាមរយៈការអនុវត្តកន្លងមក ខេត្តស្វាយរៀងសម្រេចបាននូវលទ្ធផលគួរឱ្យកត់សម្គាល់៖

 1. បានកំណត់អត្តសញ្ញាណជនមានពិការភាពសរុបចំនួន ២៦,៧០៨ នាក់ (ស្រី ១១,០៥១ នាក់)។

 2. ក្នុងនោះ ពិការភាពកាយសម្បទាមានចំនួន ១១,០១១ នាក់, ពិការភ្នែក ៦,៣០០ នាក់, ពិការសតិបញ្ញា ១,៣៧៦ នាក់, ពិការផ្លូវចិត្ត ៥៣០ នាក់ និងពិការផ្សេងៗ ៧,៤៩១ នាក់។

 3. ក្រសួងសង្គមកិច្ចបានយល់ព្រមទទួលស្គាល់ និងផ្តល់ប័ណ្ណសម្គាល់ពិការភាពជូនបងប្អូនបានចំនួន ១៥,៣២០ នាក់ ហើយ។

 4. ជនមានពិការភាពដែលស្ថិតក្នុងគ្រួសារក្រីក្រ និងទទួលបានរបបគោលនយោបាយឧបត្ថម្ភសាច់ប្រាក់មានចំនួន ៥,៣៧៩ នាក់។

ឯកឧត្តម សែម សុខា បានមានប្រសាសន៍កោតសរសើរដល់រដ្ឋបាលខេត្តស្វាយរៀង ដែលបានខិតខំប្រឹងប្រែងសម្រេចបានលទ្ធផលល្អប្រសើរនាពេលកន្លងមក។ ឯកឧត្តមបានសង្កត់ធ្ងន់ថា ទោះបីជាសម្រេចបានលទ្ធផលច្រើនក្តី ប៉ុន្តែយើងត្រូវបន្តខិតខំបន្ថែមទៀតដើម្បីកុំឱ្យមានជនមានពិការភាពណាម្នាក់ត្រូវបានបោះបង់ចោល។

ឯកឧត្តមបានណែនាំដល់អាជ្ញាធរឃុំ សង្កាត់ ត្រូវបន្តចុះស្វែងរក និងធ្វើបច្ចុប្បន្នភាពទិន្នន័យជនមានពិការភាពនៅតាមមូលដ្ឋានរបស់ខ្លួនឱ្យបានខ្ជាប់ខ្ជួន និងហ្មត់ចត់បំផុត ដើម្បីធានាថាពួកគាត់ទទួលបានអត្ថប្រយោជន៍ពីគោលនយោបាយរបស់រាជរដ្ឋាភិបាល ក្រោមការដឹកនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលតែងតែបារម្ភ និងយកចិត្តទុកដាក់ចំពោះសុខទុក្ខរបស់បងប្អូនជនមានពិការភាពនៅទូទាំងប្រទេស។

ឯកឧត្តមបានបញ្ជាក់ថា ការកំណត់អត្តសញ្ញាណកម្មតាមគំរូសង្គម និងសិទ្ធិជាមូលដ្ឋាន គឺជាជំហានដ៏សំខាន់ដើម្បី៖

 1. ធានាសិទ្ធិ និងអត្ថប្រយោជន៍៖ ជួយឱ្យជនមានពិការភាពទទួលបានសេវាសង្គម និងរបបគោលនយោបាយផ្សេងៗប្រកបដោយសមធម៌។

 2. ការដាក់បញ្ចូលក្នុងសង្គម៖ កាត់បន្ថយការរើសអើង និងផ្តល់ឱកាសឱ្យពួកគាត់ចូលរួមក្នុងសកម្មភាពសង្គម សេដ្ឋកិច្ច និងការងារ។

 3. ទិន្នន័យច្បាស់លាស់៖ ជួយដល់រាជរដ្ឋាភិបាលក្នុងការរៀបចំផែនការយុទ្ធសាស្ត្រ និងការអន្តរាគមន៍ឱ្យចំគោលដៅ ជាពិសេសសម្រាប់គ្រួសារដែលមានពិការភាព និងក្រីក្រ៕

ដោយ:ភក្ដី