សង្ក្រាន្តស្វាយរៀង ២០២៦ ទទួលបានជោគជ័យដោយរយៈពេល ៣ថ្ងៃ ទាក់ទាញភ្ញៀវមកកម្សាន្តជាង ៤០ម៉ឺននាក់ ក្រោមស្នាមញញឹម និងសុវត្ថិភាព

សង្ក្រាន្តស្វាយរៀង ២០២៦ ទទួលបានជោគជ័យដោយរយៈពេល ៣ថ្ងៃ ទាក់ទាញភ្ញៀវមកកម្សាន្តជាង ៤០ម៉ឺននាក់ ក្រោមស្នាមញញឹម និងសុវត្ថិភាព

 

ព្រឹត្តិការណ៍សង្ក្រាន្តឆ្នាំថ្មី ២០២៦ នៅខេត្តស្វាយរៀង បានបិទបញ្ចប់ទៅដោយជោគជ័យលើសពីការរំពឹងទុក ជាមួយតួលេខភ្ញៀវទេសចរយ៉ាងមហិមាដែលបានអញ្ជើញមកសម្រាកកម្សាន្តយ៉ាងសប្បាយរីករាយ និងមានទំនុកចិត្តបំផុតលើការគ្រប់គ្រងសន្តិសុខសណ្តាប់ធ្នាប់របស់អាជ្ញាធរខេត្ត។

 

យោងតាមរបាយការណ៍បូកសរុបពី លោកប្រធានមន្ទីរទេសចរណ៍ខេត្តស្វាយរៀង បានឱ្យដឹងថា ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ព.ស ២៥៧០ រយៈពេល ៣ថ្ងៃ (ចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៦) ខេត្តស្វាយរៀងទទួលបានភ្ញៀវទេសចរជាតិ-អន្តរជាតិ និងបងប្អូនប្រជាពលរដ្ឋមកលេងកម្សាន្តសរុបចំនួន ៤០៨,២២១ នាក់ ក្នុងនោះទេសចរបរទេសមានចំនួន ៧២៥ នាក់។

 

ក្រោមការដឹកនាំរបស់រដ្ឋបាលខេត្ត គ្រប់បណ្តាក្រុង-ស្រុកទាំង៨ បានរៀបចំកម្មវិធីសង្ក្រាន្តតាមមូលដ្ឋានរៀងៗខ្លួនយ៉ាងអធិកអធម។ ក្នុងនោះដែរមានការលេងល្បែងប្រជាប្រិយខ្មែរគ្រប់ទម្រង់ ការរាំលេងកម្សាន្តតាមចង្វាក់ភ្លេងប្រពៃណី និងសម័យ បានញ៉ាំងឱ្យបរិយាកាសកាន់តែមានភាពស្និទ្ធស្នាល និងសប្បាយរីករាយក្រៃលែង។ ទន្ទឹមនឹងនេះដែរនៅតាមបណ្តាវត្តអារាមនានាទូទាំងខេត្ត ត្រូវបានគេសង្កេតឃើញថាមានពុទ្ធបរិស័ទយ៉ាងច្រើនកុះករបានទៅធ្វើបុណ្យទានតាមប្រពៃណី ស្តាប់ធម៌ទេសនា និងលេងល្បែងប្រជាប្រិយក្នុងបរិវេណវត្ត ប្រកបដោយក្តីជ្រះថ្លា និងមោទនភាពជាតិ។ នៅតាមតំបន់សង្ក្រាន្តធំៗក្នុងក្រុង និងរមណីយដ្ឋាននានា សន្ទុះភ្ញៀវបានកើនឡើងពីមួយថ្ងៃទៅមួយថ្ងៃ ដែលបង្ហាញពីការជឿជាក់របស់ភ្ញៀវទេសចរលើការរៀបចំរបស់ខេត្ត។

 

អ្វីដែលជាចំណុចលេចធ្លោបំផុតក្នុងឆ្នាំនេះ គឺភាពជោគជ័យក្នុងការធានាសុខសុវត្ថិភាពជូនបងប្អូនប្រជាពលរដ្ឋ។ ក្រោមការបញ្ជាផ្ទាល់ពីសំណាក់ ឯកឧត្តមអភិបាលខេត្ត កងកម្លាំងមានសមត្ថកិច្ច និងអាជ្ញាធរគ្រប់លំដាប់ថ្នាក់ បានប្រចាំការការពារសន្តិសុខ សុវត្ថិភាព និងសម្រួលចរាចរណ៍ជូនបងប្អូនប្រជាពលរដ្ឋនៅគ្រប់គោលដៅ ២៤ម៉ោងលើ២៤ម៉ោង ដែលធ្វើឱ្យព្រឹត្តិការណ៍ទាំងមូលប្រព្រឹត្តទៅដោយគ្មានបាតុភាពអសកម្មណាមួយកើតឡើងគួរឱ្យកត់សម្គាល់ឡើយ។

 

ជារួម ជោគជ័យនៃសង្ក្រាន្តខេត្តស្វាយរៀងឆ្នាំ២០២៦ គឺជាសក្ខីភាពបញ្ជាក់ពីសាមគ្គីភាព ក្តីសប្បាយរីករាយ និងការរីកចម្រើននៃវិស័យទេសចរណ៍ក្នុងខេត្ត ដែលកំពុងរស់នៅយ៉ាងសុខដុមរមនាក្រោមម្លប់នៃសន្តិភាព និងការអភិវឌ្ឍឥតឈប់ឈរ។ ជាពិសេសភ្ញៀវទេសចរណ៍ និងប្រជាពលរដ្ឋមកចូលរួមលេងកម្សាន្តដោយភាពថ្លៃថ្នូរ និងរក្សាបាននូវវប្បធម៌ប្រពៃណីខ្មែរយ៉ាងខ្ជាប់ខ្ជួន ធ្វើឱ្យសង្ក្រាន្តខេត្តស្វាយរៀងឆ្នាំ ២០២៦ នេះ ប្រកបដោយអត្ថន័យ និងអនុស្សាវរីយ៍មិនអាចបំភ្លេចបាន។